Sosial

Ana səhifə

Sosial

Təhsil Nazirliyinin “Qaynar xətt”inə sentyabrda 3956 müraciət daxil olub

17 oktyabr 2011 15:22 (UTC +04:00)

Bakı. Sevil Zeynalqızı - APA. Təhsil Nazirliyinin “Qaynar xətt” xidmətinə bu ilin sentyabrında 3956 müraciət daxil olub. APA-nın nazirliyin saytına istinadən verdiyi xəbərə görə, müraciətlərin çoxu ümumtəhsil məktəblərinə müəllimlərin müsabiqə yolu ilə işə qəbulu, I sinfə vaxtından əvvəl qəbul, dərs bölgüsü, şagirdlərin dərsliklərlə təminatı, məktəbli forması, yaş senzinin tətbiqi və s. ilə bağlıdır.

Şikayət məzmunlu müraciətlərin çoxu yenə də ümumtəhsil məktəbləri ilə əlaqədar olub. Bakı şəhər ümumtəhsil məktəblərindən 23, digər şəhər ümumi təhsil məktəblərindən 3 (Gəncə 2, Sumqayıt və Naftalan şəhərlərinin hər birindən 1), Abşeron , Zərdab, Gədəbəy, Tovuz, Füzuli, Yardımlı, Laçın, Göyçay, Bərdə rayonlarının hər birindən 1, Şəkidən isə 4 eyni məzmunlu şikayət gəlib.

Ümumtəhsil məktəbləri ilə bağlı şikayətlərin əsas məzmununu məktəb direktorlarının idarəetmədə yol verdiyi nöqsanlar, dərs bölgüsündən narazılıq, bir neçə məktəbdə tədrisin keyfiyyətsiz təşkili, müəllimlərin əmək haqlarından tutulmalar və digər məsələlər təşkil edib. Sumqayıt şəhəri 2 saylı orta məktəbinin müəllimi şagirdin qiymətləndirilməsində səhv etdiyi üçün ona töhmət verilib. Şikayət daxil olan digər təhsil müəssisələrinə müraciətlərdə göstərilən nöqsanların aradan qaldırılması üçün müvafiq tövsiyələr verilib.

Ötən ay məktəbəqədər təhsil müəssisələrindən 11 şikayət qəbul edilib. Bu müraciətlər araşdırılıb və əksəriyyəti həllini tapıb. Texniki peşə təhsili müəssisələri ilə əlaqədar 1, dövlət ali və orta ixtisas təhsili müəssisələri ilə bağlı 3 şikayət daxil olub.