Sosial

Ana səhifə

Sosial

Xızıda “Azərbaycan İcma İncəsənəti” proqramı çərçivəsində sərgi təşkil edilib

19 oktyabr 2011 15:56 (UTC +04:00)

Xızı. Ülkər Qasımova – APA. Xızı rayonunda ABŞ-ın Azərbaycandakı səfirliyi və Azərbaycan Uşaq Fondunun əməkdaşlığı ilə “Azərbaycan İcma İncəsənəti” proqramı çərçivəsində sərgi təşkil edilib. APA-nın məlumatına görə, ABŞ-ın Azərbaycandakı səfirliyinin mədəniyyət və təhsil işləri üzrə müşaviri Kristofer Cons bildirib ki, bu proqramla bağlı Merilend Universitetinin İncəsənət Kollecinin üç əməkdaşı Azərbaycanda səfərdədir: “Proqram iştirakçıları öz rəy və hisslərini incəsənət vasitəsilə ifadə etmək üzrə təlim alır. İncəsənət xadimləri Bakı və Gəncədə valideynlərindən məhrum olmuş və küçədə yaşayan uşaqlarla fotoşəkil layihələri, Xızı və Mingəçevirdə isə məktəb uşaqları ilə rəsm layihələri həyata keçirəcəklər”.

K. Cons Azərbaycanda belə bir layihənin həyata keçirilməsinin vacibliyini vurğulayıb və Xızı rayonunun bir çox özəlliklərini qeyd edib. O, proqramın davamlı olacağına ümid etdiyini deyib.

Xızı rayon məktəbində keçirilən tədbirdə layihənin rəhbəri Kras Çhek Azərbaycan uşaqlarının istedadlı olduğunu və bu təlimlərin onlara gələcəkdə kömək olacağını bildirib. İki ildir Xızı rayon məktəbində ingilis dilindən dərs deyən, əslən Afrikadan olan Piter Tir isə fikirlərini Azərbaycan dilində ifadə edib: “Mən Azərbaycanı çox sevirəm. Azərbaycanda gənclər çox istedadlıdır. Bu rayonda mən o qədər mehriban qarşılandım ki, buradan getmək belə istəmirəm. Hələ bir il vaxtım var və bu müddətdə burada şagirdlərə ingilis dilini öyrədəcəyəm”.

Daha sonra səfirlik nümayəndəsi, eləcə də yerli media şagirdlərin əl işləri ilə tanış olub. Sərgidə bir çox mövzularla yanaşı, Dağlıq Qarabağ və Xocalı faciəsini əks etdirən rəsmlər də nümayiş etdirilib.

Qeyd edək ki, “Azərbaycan İcma İncəsənəti” adlı proqram çərçivəsində hazırlanmış işlərin iki ictimai sərgisi təşkil ediləcək. İlk sərgi oktyabrın 31-də Gəncədə, ikinci sərgi isə noyabrın 2-də Bakıda keçiriləcək. Sərgilərə giriş pulsuzdur.