Sosial

Ana səhifə

Sosial

Mirzə İbrahimovun 100 illik yubileyi ilə bağlı tədbir keçirilib

20 oktyabr 2011 09:25 (UTC +04:00)

Bakı. Pərvin Abbasov – APA. Prezident yanında Dövlət İdarəçilik Akademiyasında (DİA) xalq yazıçısı və dövlət xadimi Mirzə İbrahimovun 100 illik yubileyi ilə bağlı tədbir keçirilib. APA-nın məlumatına görə, tədbirdə akademiyanın rəhbərliyi, professor-müəllim heyəti, tələbələr, deputatlar və Mirzə İbrahimovun doğmaları iştirak edib. DİA-nın rektor əvəzi Əlikram Abdullayev Mirzə İbrahimovun böyük yazıçı və dramaturq və Azərbaycan ədəbiyyatı tarixinə adı qızıl hərflərlə yazılmış şəxslərdən biri olduğunu deyib.

Sonra DİA-nın şöbə müdiri Musa Quluzadə, xalq yazıçısının qızı Sevda İbrahimova və başqaları çıxış edərək M. İbrahimovun Azərbaycan ədəbiyyatı tarixində oynadığı roldan danışıblar. Tədbirdə yazıçının Cənubi Azərbaycanla bağlı yazılarının əhəmiyyəti də vurğulanıb.

Tədbir Azərbaycan prezidentinin Mirzə İbrahimovun 100 illik yubileyinin qeyd olunması ilə bağlı sərəncamı çərçivəsində keçirilib.

Qeyd edək ki, nasir, dramaturq, tərcüməçi, ədəbiyyatşünas, publisist Mirzə İbrahimov 1911-ci il oktyabrın 15-də (28-də) Cənubi Azərbaycanın Sərab şəhəri yaxınlığındakı Evə kəndində anadan olub, 1918-ci ildə atası və böyük qardaşı ilə birlikdə Bakıya gəlib.
Azərbaycan Elmlər Akademiyasının akademiki (1945), SSRİ Dövlət mükafatı laureatı (1950), Azərbaycan Dövlət mükafatı laureatı (1965), Beynəlxalq Nehru mükafatı laureatı (1979), Azərbaycanın əməkdar incəsənət xadimi (1941), Sosialist Əməyi Qəhrəmanı (1981), SSRİ xalq deputatı (1989) olmuş xalq yazıçısı 1993-cü il dekabrın 17-də Bakıda vəfat edib, Fəxri Xiyabanda dəfn olunub.