Sosial

Ana səhifə

Sosial

Nazir müavini: “Azərbaycandakı əlillərin potensialından yararlanmaq lazımdır”

21 oktyabr 2011 09:41 (UTC +04:00)

Bakı. Rəşad Süleymanov - APA-Economics. Azərbaycandakı əlillərin potensialını öyrənib bundan yararlanmaq lazımdır. “APA-Economics”in məlumatına görə, bunu Əmək və Əhalinin Sosial Müdafiəsi Nazirliyində (ƏƏSMN) «Sosial infrastrukturun əlilliyi olan şəxslərin istifadəsinə maneəsiz müyəssər olması: mövcud vəziyyət və beynəlxalq təcrübə» mövzusunda keçirilən seminarda nazir müavini Natiq Məmmədov bildirib.

Onun sözlərinə görə, əlillərin potensialından istifadə etməklə onların bir sıra problemlərini həll etmək mümkündür. Hazırda qüvvədə olan «Məşğulluq haqqında» qanunda əlillərlə bağlı 2,5% kvota müəyyənləşdirilib. Yeni infrastruktur layihələrində əlillərin istifadəsinin nəzərə alınmasının vacibliyinə toxunan N.Məmmədov bildirib ki, Tikinti Məcəlləsində də bu məsələ öz əksini tapacaq.

Nazir müavini onu da əlavə edib ki, hazırda ölkədə 420 minə yaxın əlil var, bunun da 60 minə yaxını 18 yaşına çatmamış şəxslərdir.

ƏƏSMN-in əlillərin sosial müdafiəsi siyasəti şöbəsinin müdiri Vüqar Həsənov isə bildirib ki, təmsil etdiyi nazirlik bir neçə dəfə dövlət strukturlarına əlillərlə bağlı təkliflər göndərib. Bu təkliflərdə maarifləndirmə tədbirlərinin artırılması, şəhər infrastrukturunun əlillərin maneəsiz hərəkətinə uyğunlaşdırılması, səkilərin hündürlüyünün nizamlanması, keçidlərdə əlil arabaları üçün yerlərin qoyulması, gözdən əlillər üçün Brayn əlifbasının təkmilləşdirilməsi və s. yer alıb.

V.Həsənov artıq ƏƏSMN-də əlillərin sosial müdafiəsinin gücləndirilməsi üçün 2012-2015-ci illəri əhatə edən proqram layihəsi üzərində işlərin getdiyini də bildirib.

Seminarda əlil təşkilatlarının və digər qurumların nümayəndələri də çıxış edib.