Sosial

Ana səhifə

Sosial

Zərdab Rayon İcra Hakimiyyəti rayon rəhbərliyinin fəaliyyəti ilə bağlı mətbuatda yazılanlara münasibət bildirib

01 noyabr 2011 14:04 (UTC +04:00)

Bakı-APA. “Son vaxtlar müxtəlif kütləvi informasiya vasitələrində Zərdab rayon rəhbərliyinin fəaliyyəti ilə bağlı həqiqətə uyğun olmayan, qeyri-ciddi, böhtan və şantaj xarakterli yazılar dərc olunur. Bir daha bəyan edirik ki, heç bir etik normalara sığmayan, reallıqdan çox-çox kənar, rayonda görülən işlərə, rayon rəhbərinin nüfuzuna kölgə salmaq məqsədi daşıyan bu yazılar yalandır və bütün bunları təkzib edirik”. APA-nın məlumatına görə, bu fikirləri Zərdab Rayon İcra Hakimiyyəti Başçısı Aparatının ictimai təşkilatlar və siyasi partiyalarla iş şöbəsinin müdiri Rahib Nuriyev deyib.

Onun sözlərinə görə, son illər ölkənin hər yerində olduğu kimi regionların sosial-iqtisadi inkişafı ilə bağlı birinci və ikinci Dövlət Proqramları çərçivəsində və dövlət büdcəsindən ayrılan vəsait hesabına Zərdab rayonunda da analoqu olmayan işlər görülür.

“Son illər Zərdab rayonu sosial mənzərəsini əhəmiyyətli dərəcədə dəyişib. Küçələrə 110 min kvadratmetr təzə asfalt örtük döşənib, Türkiyədən gətirilmiş 6 və 9 metr hündürlüyündə yeni elektrik dirəkləri quraşdırılıb, kommunal binaların dam örtükləri təzələnib, Heydər Əliyev parkı və prospekti yenidən qurulub. 2010-cu ilin təbii fəlakətindən ziyan çəkən ailələrə “32 hektar” adlanan ərazidə yeni fərdi yaşayış evləri tikilib. Hazırda bu iş davam etdirilir. Kür çayı sahilləri boyunca 60,2 km məsafədə yüksək bənd bərkitmə işləri yerinə yetirilmişdir. Son 4 ildə 7 məktəb binası tikilib, hazırda 3 məktəbin tikintisi davam etdirilir. 18 inzibati ərazidə modul tipli su təmizləyici qurğular quraşdırılıb. Rayonda ilk dəfə seysmoloji stansiya quraşdırılıb.

İnsanların uzun illər arzusunda olduqları Zərdab-Otmanoba yolu 2010-cu ildə asfaltlanıb, kəndlərə qaz xəttinin çəkilişi isə bu gün də davam etdirilir. 14 nəfər Qarabağ əlilinə fərdi ev tikilib, şəhid ailələri və Qarabağ əlilləri üçün 16 mənzilli yaşayış evi istifadəyə verilib. Şəhərin su və kanalizasiya xətlərinin tikintisinin bu ilin 4 oktyabr tarixində təməli qoyulub”.

Rahib Nuriyevin sözlərinə görə, şəhərdə Türkiyədə istehsal olunmuş elektron giriş qapısı quraşdırılıb, 42 metr hündürlüyündə Dövlət bayrağı və Bayraq Meydanı şəhərə xüsusi gözəllik verir: “Prezident İlham Əliyev bu ilin mayında Zərdab rayonunda olub, görülən işlərdən razılığını bildirib, Dövlət Başçısının müvafiq sərəncamı ilə rayonun sosial-iqtisadi inkişafının daha da sürətləndirilməsi məqsədilə əlavə 2 milyon manat vəsait ayrılıb. Hazırda ayrılmış vəsait hesabına tikinti-quruculuq işləri yüksək sürətlə davam etdirilir. Bu gün rayon ərazisində ucaldılmış möhtəşəm Heydər Əliyev mərkəzi, Veteranlar evi, Gənclər mərkəzi, Uşaq və Ailələrə Dəstək Mərkəzi, Yaradıcılıq evi açılışa tam hazırdır. Rayon Yanğından Mühafizə Şöbəsinin, Baytarlıq İdarəsinin, “32 hektar” adlanan ərazidə, Pərvanlı və Lələağacı kəndlərində məktəb binalarının, Şəftəhal kəndində tibb məntəqəsinin, Çallı kəndində doğum palatasının, Qoruqbağı kəndində uşaq bağçasının tikintisi də davam etdirilir. Kənd təsərrüfatı məhsulları istehsalını artırmaq və bu məqsədlə əkin sahələrini bol su ilə təmin etmək üçün Şəftəhal, Alıcanlı, Körpükənd, Bıçaqçı və digər çoxsaylı kəndlərdə daha məhsuldar yeni nasos stansiyalar quraşdırılıb”.