Sosial

Ana səhifə

Sosial

ARDNŞ-ın Elm Fondu 2012-ci ildə maliyyələşdirəcəyi sahələrlə bağlı müsabiqə elan edib

15 mart 2012 11:36 (UTC +04:00)

Bakı. Əli Əhmədov - APA-Economics. Azərbaycan Dövlət Neft Şirkətinin (ARDNŞ) Elm Fondu təbiət və texniki elmlər sahəsində dövlət və cəmiyyət üçün əhəmiyyət kəsb edən fundamental və tətbiqi xarakterli elmi-tədqiqat layihələrinin maliyyələşdirilməsi üzrə müsabiqə elan edib.

ARDNŞ-dan “APA-Economics”ə verilən məlumata görə, müsabiqə elmi-tədqiqat layihələri ilə yanaşı, akademik sistemdə fəaliyyət göstərən və neft-qaz, neft-kimya sənayesi ilə bağlı aktual və müasir elmi problemlərin həlli ilə məşğul olan alimlərin və müvəqqəti yaradılmış yaradıcı kollektivlərin elmi fəaliyyətinin stimullaşdırılması, onlara əlavə yaradıcılıq imkanları yaradılması məqsədi daşıyır.

Qeyd edək ki, Elm Fondunun fəaliyyəti yer elmləri, texniki elmlər, kimya elmləri və ekologiya sahələrini əhatə edir. Müsabiqə zamanı neftqazçıxarmada riyazi modelləşdirmə, diaqnostika, nəzarət və idarəetmə sistemləri, dünya standartlarına cavab verən mühərrik yanacaqlarının və yağlarının alınması üçün mütərəqqi texnologiyaların yaradılması, neft emalının dərinləşməsi, ənənəvi və qeyri-ənənəvi karbohidrogen yataqlarının axtarışı, kəşfiyyatı və işlənməsinin yeni texnologiyalarının və Azərbaycanın neft-qaz kompleksinin ehtiyat bazasının inkişaf proqnozu, quruda və dənizdə neft-qaz əməliyyatlarının keçirilməsi zamanı ətraf mühitin qorunmasına aid layihələrə üstünlük veriləcək.

Müsabiqənin şərtlərinə əsasən, ən yaxşı layihələr maliyyələşdiriləcək, sona çatdırılmış ən yaxşı elmi-tədqiqat işləri müəlliflərinin “həvəsləndirici mükafatla” qiymətləndirilməsi nəzərdə tutulur.

“Həvəsləndirici mükafat” üzrə mükafatın həcmi I yer üçün 10 min manat, II yer üçün 5 min manat (2 yer), III yer üçün 3 min manat (3 yer) nəzərdə tutulub. 2012-ci il üçün ümumi mükafatlar fondu 116 000 manat təşkil edir. Müsabiqədə fundamental və tətbiqi səciyyəli ən yaxşı elmi-tədqiqat layihələri (ET) üçün onların mürəkkəbliyindən, işin həcmindən və yerinə yetirilmə müddətindən asılı olaraq, kiçik həcmli layihələr üçün (100 min manata qədər), orta həcmli layihələr üçün (100-200 min manat), böyük həcmli layihələr üçün (200-400 min manat) maliyyə vəsaitlərinin ayrılması nəzərdə tutulur.

Müsabiqənin nəticəsinə əsasən, seçilmiş ən yaxşı xüsusi layihələr (XL) kiçik həcmli layihələr üçün nəzərdə tutulmuş məbləğdə maliyyələşdirilir. Xüsusi layihələr elmi əsərlərin Azərbaycanda və ya xaricdə nəşri, Azərbaycan dilinə və ya Azərbaycan dilindən tərcüməsi, elmi ekspedisiya və çöl işlərinin təşkili, Azərbaycanda elmi tədbirlərin təşkili və keçirilməsi, xarici elmi tədbirlərdə iştirak etmə, xarici ölkələrin birində doktorantura xətti üzrə təhsil alma.

Elmi-tədqiqat və xüsusi layihələrin ümumi maliyyələşdirmə həcmi 2,5 mln. manat nəzərdə tutulub. Müsabiqədə iştirak etmək üçün ərizələr aprelin 2-dən mayın 31-dək qəbul ediləcək. Elm Fondu tərəfindən qrantların verilməsi üzrə müsabiqənin nəticələri isə sentyabrın 20-dək açıqlanacaq.