Sosial

Ana səhifə

Sosial

Təhsil Nazirliyi dərsliklərin hazırlanması istiqamətində TQDK ilə əməkdaşlığı gücləndirəcək

15 mart 2012 14:13 (UTC +04:00)

Bakı. Sevil Zeynalqızı-APA. Təhsil Nazirliyi dərsliklərin hazırlanması istiqamətində Tələbə Qəbulu üzrə Dövlət Komissiyası ilə əməkdaşlığı gücləndirəcək. APA-nın məlumatına görə, bu fikir nazirliyin dərslik və nəşriyyat sahəsi üzrə 2011-ci ildə görülmüş işlərə dair hesabatında öz əksini tapıb. Hesabata əsasən, “Ümumi təhsil sistemində dərslik siyasəti” sənədinin təkmilləşdirilməsinin yekunlaşdırılması və təsdiqi istiqamətində tədbirlər görüləcək.

Hesabatda bildirilir ki, 2012-2013-cü tədris ilinə nəşri nəzərdə tutulan II-III, VI-XI sinif dərsliklərinin məzmununun, poliqrafik icra keyfiyyətinin yaxşılaşdırılması məqsədilə orta məktəb müəllimlərindən ibarət yaradılmış işçi qruplarının müəllif, elmi redaktor və
nəşriyyatlarla birgə işi təşkil ediləcək. Dərsliklərin rus dilinə tərcüməsinin keyfiyyətinə nəzarət artırılacaq. Ümumtəhsil məktəbləri ucun dərslik və müəllim ucun metodik vəsaitlərin mövcud qanunvericiliyə uyğun olaraq çapı və onların ümumtəhsil müəssisələrinə bölgü əsasında yeni dərs ilinin əvvəlinədək çatdırılması ilə bağlı müvafiq tədbirlər görüləcək.

Qarşıda duran vəzifələrə həmçinin məktəb kitabxanalarının oxu və təlim materialları və elektron resurslarla zənginləşdirilməsi, xüsusi tipli məktəblər ucun və milli azlıqların dillərində dərsliklərin hazırlanması, nəşri və çapı ilə bağlı tədbirlərin davam etdirilməsi də daxildir.