Sosial

Ana səhifə

Sosial

Azərbaycanda istehlakçıların hüquqlarının pozulmasına görə cəzalar sərtləşdirilib

15 mart 2012 14:37 (UTC +04:00)

Bakı. Əli Əhmədov - APA-Economics. Azərbaycanda istehlakçıların hüquqlarının pozulması ilə bağlı hallar dəqiqləşdirilib və belə hallara görə tətbiq edilən cərimələrin məbləği artırılıb. “APA-Economics”in xəbərinə görə, bu, prezident İlham Əliyevin İnzibati Xətalar Məcəlləsinə təsdiqlədiyi dəyişikliklərin qüvvəyə minməsi ilə əlaqədardır.

Dəyişikliklərə əsasən, bundan sonra bağlanan müqavilələrə istehlakçının hüquqlarını məhdudlaşdıran şərtlərin daxil edilməsi də istehlakçıların hüquqlarının pozulması halı kimi qiymətləndiriləcək (Maddə 228-də).

Bundan başqa, əgər indiyədək istehlakçıların hüquqlarının pozulmasına görə cəzalar, yəni cərimələr yalnız hüquqi şəxslər və ya vəzifəli şəxslərə tətbiq olunurdusa, bundan sonra adı çəkilən pozuntulara yol verən fiziki şəxslər də cərimələnəcək. Fiziki şəxslər üçün bu pozuntulara görə cərimələr 600 manat məbləğində müəyyən edilib. Vəzifəli şəxslərdə cərimələrin məbləği 500-1000 manat əvəzinə 1000 manat, hüquqi şəxslər üzrə isə 2-3 min manat əvəzinə 3 min manat müəyyən edilib.

Məcəlləyə əlavə edilən yeni maddəyə (Maddə 231-1) əsasən satılan mal (iş, xidmət) barəsində qanunla müəyyən edilmiş zəruri məlumatın istehlakçıya verilməməsi də istehlakçının mal (iş, xidmət) haqqında məlumat almaq hüququnun pozulması kimi qiymətləndirilir. Bu pozuntuya yol verən vəzifəli şəxslər iki yüz manat miqdarında, hüquqi şəxslər dörd yüz manat miqdarında cərimə edilir.