Sosial

Ana səhifə

Sosial

Tibb Universitetinin rüşvətxorluqda təqsirləndirilən müəlliminin məhkəmə istintaqı yekunlaşıb

15 mart 2012 15:28 (UTC +04:00)

Bakı. Şəhriyar Əlizadə - APA. – APA. Bakı Ağır Cinayətlər Məhkəməsində Azərbaycan Tibb Universitetinin “Uşaq cərrahlığı” kafedrasının assistenti Mahmud İsmayılovun cinayət işi üzrə məhkəmə prosesi davam etdirilib. APA-nın məlumatına görə, prosesdə məhkəmə istintaqının başa çatdığı elan olunub və çıxış üçün söz dövlət ittihamçısına verilib. Lakin prokuror çıxışa hazır olmadığı üçün proses martın 19-dək təxirə salınıb.

Məlumata görə, Hüseynov Aydın Zəkər oğlunun baş prokuror yanında Korrupsiyaya Qarşı Mübarizə İdarəsinin “161-Qaynar xətt” əlaqə mərkəzinə daxil olan müraciəti əsasında toplanmış material üzrə Cinayət Məcəlləsinin 311.1-ci (rüşvət alma) maddəsi ilə cinayət işi başlanıb. A. Hüseynov “161-Qaynar xətt” əlaqə mərkəzinə zəng edərək qızı Aidə Hüseynovanın üzərində apardığı cərrahiyyə əməliyyatının müqabilində Azərbaycan Tibb Universitetinin “Uşaq cərrahlığı” kafedrasının assistenti İsmayılov Mahmud Uğurlu oğlunun ondan rüşvət istəməsi barədə məlumat verib.

Müəyyən edilib ki, Mahmud İsmayılov Bakı şəhər sakini Aidə Hüseynovanın üzərində 7 oktyabr 2011-ci il tarixdə qeyd olunan kafedrada apardığı cərrahiyyə əməliyyatının müqabilində Aydın Hüseynovdan 1000 manat pul istəyib. Keçirilmiş əməliyyat tədbirləri nəticəsində Mahmud İsmayılov oktyabrın 24-də özünə məxsus avtomaşında 550 manat pulu Aydın Hüseynovdan rüşvət kimi alarkən cinayət başında tutulub.

Törətdiyi cinayət əməlinə görə M. İsmayılov Cinayət Məcəlləsinin qeyd edilən maddəsi ilə təqsirləndirilən şəxs qismində cəlb edilərək barəsində məhkəmənin qərarı ilə həbs-qətimkan tədbiri seçilib.