Sosial

Ana səhifə

Sosial

Azərbaycan Respublikası Prezidenti yanında Elmin İnkişafı Fondu 2012-ci ilin 2-ci qrant müsabiqəsini elan edib

10 may 2012 14:53 (UTC +04:00)

Bakı. Kəmalə Quliyeva – APA. Azərbaycan Respublikası Prezidenti yanında Elmin İnkişafı Fondu 2012-ci ilin 2-ci qrant müsabiqəsini elan edib. Fondun icraçı direksiyasından APA-ya verilən məlumata görə, 2-ci qrant müsabiqəsi ümumilli lider Heydər Əliyevin anadan olmasının 89-cu ildönümü münasibəti ilə keçirilən “Elimizin, elmimizin hamisi – Heydər Əliyev” adlı tədbirdə elan edilib. Fondun icraçı direktoru Elçin Babayev müsabiqənin ümummilli liderin ad günündə elan edilməsinin təsadüf olmadığını, Heydər Əliyevin elmə və təhsilə həmişə dövlət siyasətinin üstün istiqaməti kimi yanaşdığını bildirib.

E. Babayev qeyd edib ki, bu müsabiqə çərçivəsində qrant layihələrinin maliyyələşdirilməsinin həcmi 8,9 milyon manat olacaq. Müsabiqə çərçivəsində elmi-tədqiqat müəssisələrinin və digər qurumların elmi fəaliyyətini təkmilləşdirmək və davamlı inkişafını dəstəkləmək, həmçinin qısa müddət ərzində əhəmiyyətli elmi nəticələr alınmasını stimullaşdırmaq və kadr hazırlığını təmin etmək məqsədilə elmin ayrıca götürülmüş sahələrinin və istiqamətlərinin inkişafına böyük həcmli (0,5 milyon manatdan yuxarı) qrantların verilməsi yolu ilə qurumlar tərəfindən təqdim edilmiş pilot layihələrinin maliyyələşdirilməsinə xüsusi diqqət yetiriləcək. Pilot layihələr yeni yüksək texnologiyaların fiziki əsasları, qeyri-üzvi və üzvi materiallar əsasında perspektivli nazik təbəqəli sistemlər, yeni kimyəvi və yüksək molekullu birləşmələr, ətraf mühit və ekoloji təhlükəsizlik, hidrobiologiya və akvakultura, təbii resurslar və ərzaq təhlükəsizliyi kimi prioritet və aktual elmi istiqamətləri əhatə edəcək. Pilot layihələrin ümumi maliyyələşdirilmə həcmi 7,5 milyon manat nəzərdə tutulub.

Müsabiqə çərçivəsində fizika-riyaziyyat və texnika elmləri, Yer haqqında elmlər, biologiya, tibb və aqrar elmləri, kimya elmləri və humanitar və ictimai elmlər sahələrini əhatə edən fundamental-tətbiqi xarakterli layihələrin orta maliyyə həcmli (10 min – 100 min manat) qrantlar vasitəsilə maliyyələşdirilməsi də planlaşdırılıb. Bu tip layihələrin ümumi maliyyələşdirilmə həcmi 900 min manat olacaq. Kiçik (10 min manatadək) və orta (10 min – 100 min manat) maliyyə həcmli qrantların verilməsi yolu ilə isə elmi-tədqiqatların müasir tələblərə cavab verən maddi-texniki təminatı (cihazlar, qurğular, avadanlıqlar, məmulatlar və s.), respublika, regional və beynəlxalq səviyyəli konfrans, simpozium, seminarların Azərbaycanda təşkili və keçirilməsi, Azərbaycan alimlərinin və mütəxəssislərinin xaricdə keçirilən nüfuzlu regional və beynəlxalq elmi tədbirlərdə iştirakının qismən və ya tam şəkildə maliyyələşdirilməklə təmin edilməsi, ölkədə elmin inkişafı üçün mühüm əhəmiyyət kəsb edən elmi əsərlərin nəşrinin dəstəklənməsi kimi xüsusi layihələr də dəstəklənəcək. Xüsusi layihələrin ümumi maliyyələşdirilmə həcmi 500 min manatdır.