Sosial

Ana səhifə

Sosial

Azərbaycan nümayəndə heyəti Aşqabadda təşkil olunmuş “Müsəlman dünyasında qaçqınlar” mövzusunda beynəlxalq konfransda iştirak edib

15 may 2012 13:28 (UTC +04:00)

Bakı-APA. Türkmənistanın paytaxtı Aşqabad şəhərində İslam Əməkdaşlıq Təşkilatının (İƏT), BMT-nin Qaçqınlar üzrə Ali Komissarlığının (BMT QAK) və Türkmənistan Hökumətinin birgə təşkilatçılığı ilə “Müsəlman dünyasında qaçqınlar” mövzusunda beynəlxalq konfrans keçirilib. Azərbaycan Dövlət Miqrasiya Xidmətindən (DMX) APA-ya daxil olan məlumata görə, nazirlər səviyyəsində keçirilmiş konfransın işində İslam Əməkdaşlıq Təşkilatına üzv olan ölkələrin, 40-a yaxın beynəlxalq və hökümətlərarası təşkilatların nümayəndələri, 21 ölkədən, o cümlədən Rusiya Federasiyası, Çin Xalq Respublikası, ABŞ, Avropa Birliyinə üzv olan ölkələrin müşahidəçiləri iştirak ediblər.

Konfransı giriş sözü ilə Türkmənistan Prezidenti Qurbanqulu Berdımuhammədov açıb və toplantının təşkil edilməsinə görə İƏT, BMT, BMT QAK rəhbərliyinə təşəkkürünü bildirib. Tədbirdə İƏT-in baş katibi Ekmələddin İhsanoğlu, BMT-nin Qaçqınlar üzrə Ali Komissarı Antonio Quttereş çıxış ediblər.
Azərbaycan nümayəndə heyətinin rəhbəri, DMX-nin rəis müavini Pərviz Musayev konfransda çıxış edərək, Azərbaycanda qaçqınların, məcburi köçkünlərin, sığınacaq axtaran şəxslərin problemləri ilə bağlı dövlətin həyata keçirdiyi bir sıra mühüm addımlar barədə konfrans iştirakçılarını məlumatlandırıb. Xidmət rəisinin müavini bildirib ki, Azərbaycan BMT-nin Qaçqınların statusuna dair 1951-ci il Konvensiyası və onun 1967-ci il Protokoluna və eləcə də Vətəndaşsızlıq hallarının azaldılması haqqında 1961-ci il Konvensiyasına qoşulub və öz milli qanunvericiliyini tam şəkildə bu konvensiyaların tələblərinə uyğunlaşdırıb. Azərbaycan dövləti bu kateqoriyadan olan insanların problemlərinin həlli istiqamətində bir sıra qanun, normativ-hüquqi aktlar qəbul edib və onların icrası üçün zəruri tədbirlər həyata keçirir. Azərbaycanda qaçqın statusunun verilməsi ilə bağlı müvafiq prosedur təsis edilib və bu prosedurun tətbiqinin təkmilləşdirilməsi istiqamətində davamlı iş aparılır. P. Musayev bu sahədə əldə edilmiş uğurlarda BMT QAK ilə əməkdaşlığın xüsusi rolunu vurğulayaraq, Azərbaycan hökumətinə və ölkəmizdəki qaçqın və məcburi köçkünlərə göstərdiyi dəstəyə görə təşkilata öz təşəkkürünü bildirib.

Xidmət rəisinin müavini həmçinin konfrans iştirakçılarının nəzərinə çatdırıb ki, Ermənistanın 1988-1993-cü illərdə planlı şəkildə həyata keçirdiyi son etnik təmizləmə siyasəti nəticəsində tarixən həmin ərazidə yaşamış 250 min nəfər azərbaycanlı son nəfərədək öz doğma yurdlarından zorla qovulub və Azərbaycana pənah gətirib.
P.Musayev Ermənistanın Azərbaycana təcavüzü nəticəsində ölkə ərazisində məskunlaşmış qaçqın və məcburi köçkünlərin mövcud vəziyyəti ilə bağlı konfrans iştirakçılarına məlumat verib.

Pərviz Musayev daha sonra bildirib ki, bu gün Azərbaycanda "qaçqın" statusu almaq niyyətində olan (sığınacaq axtaran) 1767 şəxs mövcuddur. Bu rəqəm 18 il əvvəl təqribən 12 min nəfər olub ki, ötən illər ərzində onlardan 10 mindən artığı üçün həll yolu tapılıb. Yerdə qalan nisbətən az sayda şəxslərin məsələlərinin həlli istiqamətində müvafiq səylər göstərilir və bu sahədə Azərbaycan hökuməti BMT QAK-la əməkdaşlıq şəraitində fəaliyyətini davam etdirmək niyyətindədir. Beləliklə, hazırda Azərbaycanda bir milyona yaxın qaçqın, məcburi köçkün və «qaçqın» statusu almaq niyyətində olan (sığınacaq axtaran) şəxs var. Artıq 1998-ci ildə Ermənistandan olan 250 min nəfər azərbaycanlı qaçqına Azərbaycan vətəndaşlığı verilib.

P.Musayev çıxışının sonunda Azərbaycanın növbəti illərdə də öz öhdəliklərinə sadiq olaraq İƏT-lə əməkdaşlığının davamlı olacağına əminliyini ifadə edib.

İki gün davam edən beynəlxalq konfransın sonunda İƏT-ə üzv olan ölkələrin nazirləri və nümayəndə heyətlərinin rəhbərləri adından Aşqabad Bəyannaməsi qəbul edilib. 18 bənddən ibarət olan Aşqabad Bəyannaməsinin 9-cu bəndində təşkilata üzv olan dövlətlərin Azərbaycanın işğal olunmuş Dağlıq Qarabağ regionundan və ətraf ərazilərdən qovulmuş azərbaycanlı qaçqın və əhalinin vəziyyəti və humanitar problemlərin ölçüsü və ciddiliyi barədə dərin narahatçılığı ifadə edilib.

DMX