Sosial

Ana səhifə

Sosial

Ucar sakini alternativ enerji əldə etmək barədə layihə üzərində işləyir

19 may 2012 12:20 (UTC +04:00)

Ucar. Elvin Yaqubov - APA. Azərbaycan Gəncləri İttifaqı “Enerji və resurslardan istifadə üzrə beynəlxalq məktəbli proqramı” (SPARE) çərçivəsində bu gün Ucar rayonunda tədbir keçirib. APA-nın məlumatına görə, Azərbaycanda ekoloji problemlərin həllində məktəblilərin təşəbbüskarlığının artırılması və iştirakının təmin edilməsi məqsədi daşıyan proqram çərçivəsində Ucarın bir sıra məktəblərində müəllim və şagirdlərlə görüş keçirilib, şəhər 2 saylı məktəbdə SPARE Resurs Mərkəzinin açılışı olub. Ekologiya sahəsində interaktiv dərslərin təşkili, təqdimatların keçirilməsi üçün yaradılan mərkəzdən müəllim və şagirdlər faydalanacaq. Sonra 2 saylı məktəbin həyətində ekologiyaya dəstək məqsədilə ağaclar əkilib, bilik yarışması keçirilib və qaliblər mükafatlandırılıb.
Təbirdə Azərbaycan Gəncləri İttifaqının təşkilatçılığı ilə dördüncü ildir ki, keçirilən “Enerji və ətraf mühit” mövzusunda respublika müsabiqəsinin Ucardan olan 3 qalibinə də mükafatlar təqdim olunub. Müsabiqənin 12 qalibindən biri olan Ucar şəhər 2 saylı orta məktəbin coğrafiya müəllimi Fatma Abbasovanın alternativ enerji ilə bağlı ixtirası hamının diqqətini cəlb edib. F. Abbasova yerin daxili enerjisi hesabına dünyada ilk dəfə olaraq yeni üsulla elektrik enerjisi əldə etməyin mümkün olduğunu açıqlayıb.
O, İslandiyada alternativ enerji mənbəyi kimi istifadə olunan qeyzerləri ölkəmizdə süni şəkildə yaratmaqla, geotermal suları yerin üzərinə çıxarmaqla böyük rayonları elektrik enerjisi və istiliklə təmin etmək üçün yeni layihə üzərində çalışdığını və oktyabradək bununla bağlı təkliflərini layihə şəklində müvafiq qurumlara təqdim edəcəyini bildirib. Ucar sakini heç bir xammal və yanacaq sərf etmədən bu yeni üsulla əldə ediləcək enerjini digər alternativ enerji mənbələrindən çox ucuz başa gəldiyini vurğulayıb.

alternativ enerji