Azərbaycan Tibb Universitetinin (ATU) rektoru, professor Gəray Gəraybəyli 2022-2023-cü tədris ilində dövlət sifarişi üzrə boş qalan yerlərə keçən tələbələrlə görüşüb.
ATU-dan APA-ya verilən xəbərə görə, son illər Azərbaycan Tibb Universitetində (ATU) müxtəlif kurslar üzrə ödənişli əsaslarla təhsil alan tələbələrin bir qisminin dövlət hesabına təhsil almasına imkan yaradılır. Bu il də akademik göstəriciləri yüksək olan daha 25 tələbə ödənişli əsaslarla təhsildən, dövlət sifarişi əsasında təhsil formasına keçirilib.
Tələbələrlə görüşdə ATU rektoru Gəray Gəraybəyli bu münasibətlə onları təbrik edib, daha böyük uğurlar arzulayıb. Rektor digər ali təhsil müəssisələrində olduğu kimi ATU-da da tələbələrin həm dövlət sifarişli, həm də ödənişli əsaslarla təhsil aldıqlarını bildirib:
“Hər il dövlət sifarişi əsasında təhsil alan tələbələr arasında müxtəlif səbəblərdən təhsilini saxlayanlar olur. Bununla əlaqədar artıq neçə ildir ki, Səhiyyə Nazirliyi və Elm və Təhsil Nazirliyi arasında qarşılıqlı razılığa əsasən boş qalan yerlərə ödənişli əsaslarla oxuyan tələbələrin arasından ən yaxşı akademik nəticəsi olanlar keçirilir. Bu il də tam şəffaf formada aparılan müsabiqə prosesi nəticəsində 25 tələbənin dövlət sifarişi əsasında təhsil formasına keçirilməsi baş tutub”.
Universitetin rektoru Gəray Gəraybəyli bildirib ki, dövlət sifarişi əsasında təhsil ailələrin maddi yükünü azaldır, tələbənin təhsilə marağını daha da stimullaşdırır. Hazırda ATU-da tələbələrin 80 %-i dövlət hesabına, 20%-i isə ödənişli əsaslarla təhsil alır.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
