Azərbaycanda şərab turizminin inkişafı üçün böyük potensial var

Azərbaycanda şərab turizminin inkişafı üçün böyük potensial var
# 02 dekabr 2023 16:32 (UTC +04:00)

Bakıda "Azərbaycanda şərab turizminin perspektivləri" mövzusuna həsr olunmuş konfrans keçirilib.

APA xəbər verir ki, konfrans Azərbaycan Respublikasının Dövlət Turizm Agentliyinin təşkilatçılığı ilə keçirilib.

Tədbirdə Azərbaycan Turizm Bürosunun Baş icraçı direktoru Florian Zenqstşmid, Qlobal Şərab Turizmi Təşkilatının (Global Wine Tourism Organisation - GWTO) prezidenti Xose Antonio Vidal, şərab istehsalı və şərab turizmi üzrə ixtisaslaşmış şirkət nümayəndələri iştirak edir.

Konfransda Florian Zenqstşmid ölkəmizdə şərab turizminin inkişafı üçün böyük potensialın olduğunu və Azərbaycanın şərabçılıq ənənələrinin və məhsullarının iştirak edilən beynəlxalq turizm sərgilərində nümayiş etdirildiyini qeyd edib.

GWTO rəhbəri Xose Antonio Vidal və təşkilatın Avrasiya regionu üzrə vitse-prezidenti Leonid Gelibterman tərəfindən müvafiq mövzular üzrə çıxışlar edilib. Onlar da şərab turizminin inkişafına diqqət etməyin vacibliyini vurğulayıb. Koronavirus pandemiyasının turizm sahəsinə mənfi təsirləri qeyd edilib. Bildirilib ki, Azərbaycanın turizm sahəsində həyata keçirdiyi uğurlu layihələrin nəticəsi olaraq bu sahədə yaranmış çətinliklər demək olar ki, aradan qaldırılıb.

"Məmnuniyyətlə bildirmək istəyirəm ki, bu gün GWTO xəritəsində ekspertləri və şərab mədəniyyətinin pərəstişkarlarını cəlb edəcək daha bir ölkə var - Azərbaycan.
Bölgənin zəngin tarixi, yerli torpaq ərazilərin xüsusiyyəti və burada istehsal olunan şərabların orijinallığı bütün dünyadan turistlərin cəlb edilməsini dəstəkləyəcək, iqtisadi inkişafa töhfə verəcək və ölkənin turizm potensialının daha da artırılmasına kömək edəcək uğurun tərkib hissəsidir", - deyə Xose Antonio Vidal qeyd edib.

Həmçinin konfrans çərçivəsində Azərbaycanda ilk olaraq "Şəki Şərab" zavodunun Qlobal Şərab Turizmi Təşkilatına (GWTO) üzv olması haqqında rəsmi sertifikatın təntənəli təqdimatı olub.

Konfrans çərçivəsində Azərbaycan Turizm Bürosunun Qastronomiya turizminin idarəedilməsi departamentinin direktoru Səkinə Əsgərova Azərbaycanda qastronomiya turizmi sahəsində nəzərdə tutulan layihələr barədə məlumatlar iştirakçıların diqqətinə çatdırıb.

Bundan əlavə, şərab istehsalı və şərab turizmi üzrə ixtisaslaşmış şirkət nümayəndələri təmsil etdikləri şirkətlərin təcrübələrini əks etdirən məlumat xarakterli təqdimatlar ediblər.

#
#

ƏMƏLİYYAT İCRA OLUNUR