Valideyn öz övladının məktəb proqramını anlamırsa, burada bir uyğunsuzluq var.
APA xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə "Tədqiqat, təcrübə və siyasət vasitəsilə təhsildə ayrı-seçkiliyin aradan qaldırılması” şüarı altında keçirilən VII ADA 2024 Beynəlxalq Təhsil Konfransı zamanı deyib.
“İndiki çağırışlara uyğun olan innovasiyalar tətbiq etməliyik. Sovet dövründə valideyn özü hansı tədrisə yiyələnmişdisə, övladı da eyni təhsili alırdı. Buna görə də valideyn rahat şəkildə öz övladının dərsləri ilə məşğul olurdu. Lakin indi ibtidai sinifdə verilən bəzi anlayışları bəzi müəllimlər heç ali məktəbdə belə keçməyiblər. Burada bir uyğunsuzluq var. Biz bunu tənzimləməliyik. Çünki belə olan halda hansısa üçüncü şəxslər, yəni repetitorlar uşaqların tədris həyatına daxil olur" – o qeyd edib.
DİM sədri qeyd edib ki, hazırda tətbiq edilən müqayisəli qiymətləndirmə metodu ilkin illərdə uyğunsuzluğa səbəb olurdu:
“Lakin hazırda bu proses tənzimlənib”.
Məleykə Abbaszadə qeyd edib ki, yeniliklər tətbiq edilirsə, prosesin subyektləri də buna hazır olmalıdır:
“Müəllim bildiyini auditoriyada öyrədə bilər. 2002-ci ildən sonra artıq məktəblərdə kompüterləşmə həyata keçirildi. Bu, kompüterləşmə prosesinin ikinci dalğası idi. Birinci dalğa sovet dövründə aparılıb, o da tamamilə uğursuz layihə olub. 2002-2004-cü illərdə bu proses uyğunsuz oldu. Yeniliklər tətbiq ediləndə bu prosesin subyektləri də buna hazır olmalıdır".
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
