“Parisdə nəşr olunan “La Mond” qəzeti vasitəsilə 11 fransız siyasətçi Prezident Makrona müraciət edib ki, Ermənistanın “təhlükəsizliy”inin təmin olunması məqsədilə Azərbaycana qarşı bir sıra tədbirlər görülsün. Siyasi əxlaqdan, ümumiyyətlə, beynəlxalq hüquqdan tamamilə uzaq olan insana xas olan bu təkliflər sırasında hətta Azərbaycana qarşı sanksiyaların tətbiqi, beynəlxalq sülhməramlıların ölkəmizə göndərilməsi, Beynəlxalq Cinayət Məhkəməsinə müraciət edilməsi yer alıb”.
APA xəbər verir ki, bunu Milli Məclisin bu gün keçirilən iclasında deputat Nizami Səfərov deyib.
Deputat bildirib ki, hər cür beynəlxalq cinayət bizim ərazimizdə törədilib: “Azərbaycan bu məhkəmənin Nizamnaməsini imzalamayıb və ratifikasiya etməyib. Anvaq qeyd olunmalıdır ki, hər dörd beynəlxalq cinayət bizim ərazimizdə törədilib. Təsəvvür edin, əhalisi etnik təmizləməyə məruz qalan, minlərlə günahsız insanı soyqırımı və insanlıq əleyhinə cinayətin qurbanı olan, özündə müharibə cinayətlərinin bütün əlamətlərini ehtiva edən qadağan olunmuş klaster, kasset və fosfor sursatları ilə mülki əhalisi və mülki infrastrukturu məhv edilən, mədəni irsinə və ekoloji sisteminə bərpa olunmayan ziyan vurulan Azərbaycanın məsuliyyəti ortaya atılır. Hüquqi cəhətdən yalnız xəstə təxəyyülün məhsulu olan bu absurd təklif müəlliflərinə bir daha xatırlatmaq istərdim ki, Beynəlxalq Cinayət Məhkəməsinin Nizamnaməsinə uyğun olaraq, onun yurisdiksiyası iştirakçı dövlətlərin ərazisində baş verən cinayətlərə şamil olunur və yalnız milli hüquq mühafizə sisteminin bu cinayətləri təqib edə bilmədiyi və ya təqib etmək üçün iradə nümayiş etdirmədiyi hallarda işə düşə bilər. Ancaq ərazisində beynəlxalq cinayətlər törədilən və hətta iştirakçı-dövlət olmayan ölkə Beynəlxalq Cinayət Məhkəməsinin Nizamnaməsinin 12-ci maddəsinə uyğun olaraq xüsusi deklarasiya qəbul edib, konkret işləri məhkəmənin baxışına çıxara bilər. Beynəlxalq hüquqa əsasən, nə Fransa, nə Ermənistanın Nizamnaməyə zidd olaraq, Beynəlxalq Cinayət Məhkəməsinə müraciət etmək hüququ var. Bunu yalnız beynəlxalq cinayətlərdən uzun müddət əziyyət çəkən və mülki əhalisi ən ağır cinayətlərin qurbanı olan Azərbaycan edə bilər”.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
