Bakı. Şəhriyar Əlizadə - APA. Azərbaycanda 10 və 11-ci sinif şagirdləri üçün 1 aylıq hüquq təlimi keçiriləcək.
“Azərbaycan Hüquq İslahatları Mərkəzi” (AHİM) İctimai Birliyindən (İB) APA-ya verilən məlumata görə, birliyin Almaniya Beynəlxalq Əməkdaşlıq Cəmiyyəti (GİZ) ilə birgə həyata keçirdiyi “Konstitusiya və Mən” layihəsi çərçivəsində məktəblilər üçün “Hüquq və Mən” adlı 1 aylıq nəzəri-təcrübi məşğələlərin keçirilməsi nəzərdə tutulub.
Məlumata görə, layihə indiyə kimi həyata keçirilmiş analoji tədbirlər arasında öz unikallığı ilə seçilir. Belə ki, məşğələlərdə istifadə olunması üçün ilk dəfə Azərbaycan dilində ayrıca vəsaitlər hazırlanıb. Layihə pilot olaraq Bakının 5 orta məktəbində keçiriləcək. 10-11-ci sinif şagirdləri üçün nəzərdə tutulan layihənin məqsədi onların hüquqi biliklərinin inkişaf etdirilməsi və gələcəkdə üzləşə biləcəklər hüquqi vəziyyətlərdə etməli olduqları davranışların öyrədilməsidir. Nəzəri-təcrübi məşğələlər AHİM tərəfindən seçilmiş 5 nəfər təlimçi tərəfindən aparılacaq. Məşğələlərin keçirilməsi üçün hazırlanmış dərs vəsaitində Azərbaycanın hüquq sistemi və hüquq tarixi, əsas insan hüquq və azadlıqları, ölkəmizin məhkəmə sistemi, Avropa İnsan Hüquqları Məhkəməsi barədə məlumatlar yer alıb. İşçi dəftərdə isə qeyd olunmuş hüquqi məlumatlara həsr olunmuş illüstrativ-praktiki tədris tapşırıqları krossvord, test, sual-cavab formasında əks olunub.
Layihənin gələcəkdə digər orta məktəblərdə də keçirilməsi nəzərdə tutulur.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
