Bakı. Könül Kamilqızı – APA. Beynəlxalq Əmək Təşkilatının (BƏT) 102-ci sessiyasında iştirak etmək üçün Cenevrədə səfərdə olan Azərbaycanın əmək və əhalinin sosial müdafiəsi naziri Fizuli Ələkbərov sessiyanın plenar iclasında çıxış edib. Nazirliyin mətbuat xidmətindən APA-ya verilən xəbərə görə, Azərbaycanda yürüdülən siyasətlərdə makroiqtisadi sabitliyin təmin olunması ilə yanaşı, qlobal proseslərdən irəli gələn çağırışların, gələcəyə hesablanan hədəflərin daim diqqətdə saxlanıldığını bildirən nazir Fizuli Ələkbərov respublikada icra olunan sosial proqramlar, o cümlədən yeni iş yerlərinin açılması, rəqabət qabiliyyətli əmək potensialının yetişdirilməsi, əmək bazarının inkişafı və s. sahələrdə görülən işlər və əldə olunan nailiyyətlər barədə sessiya iştirakçılarına ətraflı məlumat verib.
Nazirin çıxışında ölkədə son doqquz ildə 3 dəfədən çox iqtisadi artıma nail olunduğu, 1 milyon 200 mindən çox yeni iş yeri yaradıldığı, işsizliyin 5,2 faizə, yoxsulluğun 6 faizədək azaldığı qeyd olunub. Eyni zamanda, çıxışda sosial ədalət meyarlarına söykənən iqtisadi-sosial idarəetmənin təmin olunması, insan kapitalının inkişafı, əmək resurslarının iqtisadi tərəqqiyə uyğunlaşdırılması, layiqli əməyin təminatı məqsədilə fəal beynəlxalq əməkdaşlıq müstəvisində və mütərəqqi dünya təcrübəsi əsasında icra olunan məqsədyönlü strategiyalardan söz açılıb.
Sessiya çərçivəsində nazir Fizuli Ələkbərovun BƏT-in rəhbər şəxsləri, ayrı-ayrı ölkələrdən olan əmək və sosial müdafiə qurumlarının rəhbərləri və sosial tərəfdaşlarla ikitərəfli görüşlər keçirməsi nəzərdə tutulur.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
