Xarici siyasət

Ana səhifə

Xarici siyasət

Hüseyn Avni Qarslıoğlu: “Azərbaycanda səfir olmaq peşə fəaliyyətimin zirvəsidir”

19 fevral 2008 10:44 (UTC +04:00)

Bakı. Gülşən Hacıyeva-APA. Ölkəmizdə diplomatik missiyasını başa vuran Türkiyənin fövqəladə və səlahiyyətli səfiri Hüseyn Avni Qarslıoğlu fevralın 20-də Azərbaycanı tərk edir. Türkiyədə Prezident katibliyinin rəhbəri vəzifəsinə təyin olunmuş H. A. Qarslıoğlu Azərbaycanı tərk etməzdən əvvəl sonuncu müsahibəsini APA-ya verib.

- Azərbaycanı hansı hisslərlə tərk edirsiniz?
- Hazırda evindən qoparılan insan kimiyəm. Ancaq mən bu yuvamdan o biri yuvama gedirəm. Bunlar mənim üçün təsəllidir. Mənə buradan daha yüksək vəzifəyə getdiyimi deyirlər. Lakin mən hesab edirəm ki, hansı vəzifənin daha yüksək olduğu bir az nisbi anlayışdır. Azərbaycanda səfir olmaq mənəvi cəhətdən peşə fəaliyyətimin zirvəsidir. Burada küçəyə çıxanda, rayonlara gedəndə gördüyüm sevgini başqa ölkədə yaşamaq mümkün deyil. Yəni, Azərbaycandan belə bir duyğu ilə ayrılıram.
- Türkiyədə Prezident katibliyinin rəhbəri vəzifəsində çalışacaqsınız. Yeni vəzifədə iki ölkə arasında əməkdaşlıq və münasibətlərin daha da dərinləşməsi üçün hansı addımları atmağı düşünürsünüz?
- Mən orada prezidentin gündəlik işlərini izləyəcəyəm. Xarici siyasəti mən müəyyənləşdirməyəcəyəm. Ancaq bəzi toplantılarda, xarici səfərlərdə söhbətlərimdə Azərbaycan həqiqətlərini çatdırmağa çalışacağam.
- Dağlıq Qarabağ probleminin həllində Azərbaycana yardımçı olmaq üçün Türkiyənin hansı addımlar atması mümkündür? Bundan başqa, Türkiyə mətbuatında PKK terrorçularının Ermənistanda və işğal altında olan Azərbaycan ərazilərinə keçdiyi barədə məlumatlar yayılır. Türkiyə bu istiqamətdə hansı addımlar atmağı düşünür?
- Dağlıq Qarabağ təkcə Azərbaycanın yox, hamımızın problemidir. Məlumatlara gəlincə, biz işimizi Türkiyə mətbuatının yaydığı xəbərlər əsasında qurmuruq. Əvvəlcə, belə xəbərlərin təsdiqlənməsi lazımdır. Əgər təsdiqlənsə, onda ciddi nəticələr doğurar. ABŞ və Avropa ölkələri PKK-nı terror təşkilatı kimi tanıyır. Bir terror təşkilatına açıq dəstək verilməsinin hansı nəticələrə gətirib çıxaracağı isə məlumdur. Şimali İraqda keçirilən əməliyyatları göz önündədir. PKK terrorçularının Ermənistanda və ya işğal altındakı Azərbaycan torpaqlarına yerləşdirilməsi beynəlxalq aləmdə ciddi narazılıqlara səbəb olar. Bu məlumatların dəlil və sənədlərlə sübuta yetirilməsi lazımdır.
- Kosovonun müstəqilliyini elan etməsi dünya tərəfindən birmənalı qarşılanmadı...
- Yuqoslaviya 1990-cı ildən dağılmağa başlayıb. Əvvəl Almaniya Sloveniyanı tanıdı, sonra Xorvatiyada, Bosniyada müharibə başladı, bir müddət sonra Qaradağ və Makedoniya ayrıldı. Kosovo da həmin respublikalarla eyni statusda idi, yəni faktiki olaraq ayrı idi. Yuqoslaviya süni yaradılmış bir respublika idi, zamanın sınağından çıxa bilmədi. Dağlıq Qarabağ isə tamam başqa məsələdir. Əvvəla, ona görə ki, Dağlıq Qarabağ heç vaxt hüquqi cəhətdən Ermənistanın bir hissəsi olmayıb, həmişə Azərbaycanın tərkibində olub. Hətta prezidentin dediyi kimi, Ermənistan da sonradan İrəvan xanlığının torpaqları üzərində qurulub. Buna görə Kosovo Dağlıq Qarabağ üçün presedent ola bilməz. Dağlıq Qarabağın Azərbaycandan ayrılması mümkün deyil. Orada ermənilər tərəfindən azərbaycanlılara qarşı etnik təmizləmə aparılıb. İlk növbədə, didərgin düşmüş həmin şəxslər vətənlərinə qayıtmalıdırlar ki, mən onların qayıdacaqlarına inanıram. Şimali Kipr Türk Respublikasının statusu da tamam fərqlidir. Dağlıq Qarabağ hətta Abxaziya ilə belə müqayisə oluna bilməz. Hər bölgənin özünəməxsus şərtləri var. Dağlıq Qarabağ hər zaman Azərbaycanın ayrılmaz hissəsi olub, bundan sonra da belə olacaq.
- Dünya Azərbaycanlıları Konqresinin İdarə Heyətinin üzvü Vəli Kiçiyin həbsi Azərbaycanda narazılığa səbəb oldu. Bu məsələyə münasibətiniz necədir?
- Qanun çərçivəsində görülən tədbirlərə niyə etiraz edilməlidir ki? Məhkəmə hələlik qərar vermədiyi üçün onun cinayətkar olduğunu söyləmək olmaz. Ancaq kiminsə adı cinayətə qarışıbsa, burada milli mənsubiyyət və ya vaxtilə yüksək vəzifələrdə çalışmaq nəticəni dəyişdirməz.
- “PETKİM”-in satışı ilə bağlı tenderdə Azərbaycan Respublikası Dövlət Neft Şirkətinin də daxil olduğu konsorsium qalib gəlsə də, sonradan bu satışın nəticəsi ləğv olundu. Bu addım iki ölkə arasında iqtisadi əməkdaşlıq sahəsində əlaqələrə nə dərəcədə mənfi təsir göstərir?
- Bu, hüquqi bir prosesdir. Türkiyədə bəzi təbəqələr özəlləşdirmənin əleyhinədir. Bu tenderdə hansı ölkənin nümayəndəsi qalib gəlsəydi, nəticə dəyişməyəcəkdi. Biz isə özəlləşdirmənin tərəfdarıyıq.
- Türkiyədə baş örtüyü məsələsi həllini tapmayıb. Bu məsələnin tam həlli mümkün olacaqmı?
- Bu qanun Türkiyə Böyük Millət Məclisində qəbul olunub. Dünyanın bir çox ölkəsində, o cümlədən Rusiya, İngiltərə, ABŞ, Fransa, Almaniya, Suriya, Norveç, Bolqarıstan və Azərbaycanda da qızlar baş örtüyü ilə universitetə daxil olursa, bu Türkiyədə niyə olmasın?