Afrika

Ana səhifə

Afrika

Liviya səfirləri istefa verməyə başlayıblar

21 fevral 2011 19:38 (UTC +04:00)

Bakı-APA. Liviyanın bir neçə ölkədəki səfirləri hökumətin nümayişçilərə qarşı zorakılığına etiraz əlaməti olaraq istefa veriblər.

Çin, Böyük Britaniya və Hindistanın ardınca Banqladeş, Polşa və İndoneziyadakı Liviya səfirləri də istefa veriblər. Londondakı bütün səfirlik korpusu fəaliyyət göstərmir. Liviyanın İsveçdəki səfirliyinin 3 nəfər əməkdaşı da istefa verdiklərini bəyan ediblər.

Daha öncə Liviyanın ədliyyə naziri Mustafa Məhəmməd Əbdül Cəlil hakimiyyətin ifrat zorakılığını tənqid edərək istefa verib. Ölkənin Ərəb Dövlətləri Liqasındakı daimi nümayəndəsi Əbdül Munim əl-Huni «Liviya xalqının kütləvi qətliamına» etiraz əlaməti olaraq istefaya getdiyini bəyan edib.

Liviyada nümayişlər fevralın 15-də başlayıb. Nümayişçilər Müəmmər Qəzzafinin istefasını tələb edirlər. Hüquq müdafiəçiləri qarşıdurmalar nəticəsində 233 nəfərin həlak olduğunu bildirirlər. Rəsmilər 84 nəfərin öldüyünü iddia edirlər.

Bazar ertəsi axşam Liviya Hərbi-hava qüvvələri nümayişçilərə aviazərbələr endiriblər.

Böyük Britaniya XİN başçısı Uilyam Heyq Müəmmər Qəzzafinin ölkəsini tərk edərək Venesuelaya yola düşə biləcəyini bildirib.