Aqrar-sənaye kompleksi

Ana səhifə

Quba rayonunda kivi yetişdirilməsinə başlanılıb

07 noyabr 2009 02:22 (UTC +04:00)

Bakı – APA. Qubada fəaliyyət göstərən meyvəçi alimlərin subtropik bitki olan kivini sınaq məqsədilə şimal bölgəsində yetişdirmək təcrübəsi uğurla nəticələnib.

APA-nın məlumatına görə, artıq soyuq iqlimli Qubada da kivi yetişir. 50-yə qədər növü olan kivi dünyanın bir sıra tropik və subtropik iqlimli ölkələrində, o cümlədən, Çində, Koreyada, Yeni Zelandiyada, Çilidə daha geniş şəkildə yetişdirilir. Rus alimi Miçurin XX əsrin əvvəllərində bu meyvəni şimal ölkələrində yetişdirmək üçün təcrübələr aparıb. On beş il bundan əvvəl isə azərbaycanlı alimlər kivini respublikamızın cənub bölgəsində yetişdirməyə müvəffəq olub.

Qubada fəaliyyət göstərən Azərbaycan Elmi Tədqiqat Bağçılıq və Subtropik Bitkilər İnstitutu əməkdaşlarının bir neçə il əvvəl şimal bölgəsində başladığı təcrübələr də uğurla nəticələnib. Alimlərin bu təcrübəsi ilə maraqlanan Quba rayonu Zərdabi kənd sakini Fəxrəddin Mirzəğayev kivini öz həyətyanı sahəsində becərməyə müvəffəq olub. O, bu il hər ağacdan 60-70 kq məhsul götürəcəyini bildirir. Bir neçə gündən sonra yığım prosesinin başlayacağını deyən F.Mirzəğayev hələlik 4 ağacdan məhsul gözləyir. Bağban kivinin iqtisadi əhəmiyyətini nəzərə alaraq ağacların sayını artırmaq fikrindədir. Alimlər də bu meyvənin vitaminlərlə zəngin olduğu bildirməklə həm də kividən bədxassəli şişlərə qarşı istifadənin fayda verdiyini bildirir və kivi plantasiyalarının yaradılmasını zəruri hesab edir.