Aqrar-sənaye kompleksi

Ana səhifə

Aqro İnformasiya Mərkəzi aqrar sahədə ekoloji layihələrin icrasına başlayacaq

20 noyabr 2009 01:48 (UTC +04:00)

Bakı. Rəşad Süleymanov – APA-Economics. Aqro İnformasiya Mərkəzi (AİM-Azərbaycan) 2010-cu ilin yanvar ayından aqrar sahədə ekoloji layihələrin icrasına başlayacaq. Bu barədə «APA-Economics»ə «AİM-Azərbaycan» təşkilatından məlumat verilib.

Avropa donor təşkilatları konsorsiumu layihənin 2010-2012-ci illəri əhatə edən I fazasının maliyyələşdirilməsinə razılıq verib. “Davamlı fermerlik sisteminin yaradılması ilə kənd əhalisinin iqlim dəyişikliyinə uyğunlaşdırılması və onun mənfi təsirlərinin azaldılması potensiallarının gücləndirilməsi” adlı layihə Ağcabədi, Beyləqan, Zərdab, Bərdə və Tərtər olmaqla 5 rayonu əhatə edəcək. Layihənin əsas məqsədi ekoloji fermerlik və konservasiyalı becərmə təcrübələrini tətbiq etmək, sosial və təsərrüfat meşəçiliyi ilə yararsız torpaqların bərpasından yararlanmaqla bu rayonlarda fermerlərin, həmçinin məcburi köçkünlərin həyat şəraitlərinin yaxşılaşdırılmasına və ekoloji tarazlığın bərpasına nail olmaqdır.

Layihənin sonunadək 130-150 fermerin kənd təsərrüfatına yararsız hesab edilən torpaqlarında duzadavamlı ağac növlərindən ibarət 50 ha-dək sahədə meşə salınacaq, ölkədə fermer meşəçilik təsərrüfatının yaradılmasına dair maarifləndirmə işləri aparılacaq, 150 fermer təsərrüfatını əhatə edən 25 ekoloji məhsul istehsalçısı qrupu yaradılacaq, 0-80 təsərrüfatda konservativ əkinçilik tətbiq olunaraq nəticəsi ən azı 1500 fermerə çatdırılacaq. Ümumiyyətlə, layihədən 7 minədək fermerin bəhrələnəcəyi gözlənilir.

Məlumat üçün bildirək ki, 1999-cu ildən fəaliyyət göstərən «AİM-Azərbaycan» indiyədək ödənişli məsləhət konsepsiyasının yaradılması və inkişafı istiqamətində ayrı-ayrı beynəlxalq təşkilatlarla müxtəlif layihələr həyata keçirib. Azərbaycanın mərkəzi, cənub və qərb regionlarını əhatə edən 23 rayonda 331 kənd təsərrüfatı məsləhətçisi AİM-in təlim kursunun məzunu olub ki, hazırda onlar 30 min nəfərdən çox fermerə xidmət göstərir.