Aqrar-sənaye kompleksi

Ana səhifə

«ABŞ texnika və texnologiyalarının Azərbaycanın kənd təsərrüfatında tətbiqi» mövzusunda təqdimat keçirilib

24 noyabr 2009 09:51 (UTC +04:00)

Bakı. Rəşad Süleymanov – APA-Economics. Bu gün Azərbaycan Sahibkarlar (İşəgötürənlər) Konfederasiyasında (ASK) «Tİ Aqroservis» MMC tərəfindən «ABŞ texnika və texnologiyalarının Azərbaycanın kənd təsərrüfatında tətbiqi» mövzusunda təqdimat keçirilib.

«APA-Economics»in xəbərinə görə, tədbirdə çıxış edən ASK-nın prezidenti Məmməd Musayev bildirib ki, fermerlər son illər məhsuldarlığı artırmaq və məhsul itkisini minimuma endirmək üçün qabaqcıl texnologiyaların tətbiqinə maraq göstərir. Artıq bir sıra sahibkarlar ABŞ, Yaponiya, İsrail və s. ölkələrdən müasir kənd təsərrüfatı texnikalarını Azərbaycana gətirərək tətbiq edib və müsbət nəticələr əldə olunub.

«Tİ Aqroservis» MMC-nin direktoru Tengiz Jikia isə sahibkarlara ABŞ-ın «Valmont İrrigation İnc» şirkətinin süni yağmurlama sistemi, «John Deere İnternational» şirkətinin traktor və aqrotexniki avadanlıqlarını təqdim edib. T.Jikia bildirib ki, bu avadanlıqlar artıq Biləsuvar rayonunda tətbiq edilib. Rayonda 3 400 ha əkinə yararsız ərazidə ABŞ-ın son model texnologiyalarının tətbiqi ilə həyata keçirilən əkin işləri müsbət effekt verib. Şirkət analoji tədbirləri digər rayonlarda da həyata keçirməyi planlaşdırır.

Qeyd edək ki, təqdimat mərasimində İqtisadi İnkişaf və Kənd Təsərrüfatı nazirliklərinin, Sahibkarlığa Kömək Milli Fondunun, «Aqrolizinq» ASC-nin və digər təşkilatların nümayəndələri iştirak edib.