Aqrar-sənaye kompleksi

Ana səhifə

Azərbaycan yanvar-noyabr aylarında kənd təsərrüfatı istehsalını 3,3% artırıb

18 dekabr 2009 07:35 (UTC +04:00)

Bakı. Nicat Mustafayev – APA-Economics. Bu ilin dekabrın 1-i vəziyyətinə Azərbaycanda qarğıdalı da daxil olmaqla 1 125,6 min hektar taxıl sahəsindən hər hektardan orta hesabla 26,6 sentner olmaqla bütövlükdə 2 988,3 min ton dənli və dənli paxlalı məhsulu toplanıb ki, ötən ilin eyni dövrü ilə müqayisədə məhsuldarlıq 19,6% artıb.

Dövlət Statistika Komitəsindən «APA-Economics»ə verilən məlumata görə, toplanılan məhsulun 2 137,5 min tonu və ya 71,5%-i payızlıq və yazlıq buğda, 151,2 min tonu və ya 5,1%-i isə qarğıdalı dəninin payına düşüb.

Qarğıdalı daxil olmaqla taxıl istehsalı sahəsində ayrı-ayrı rayonlarda nisbətən daha yüksək nəticələr əldə edilib ki, bu il Şəkidə 232,3 min ton, Cəlilabadda 131,8 min ton, Sabirabadda 115,8 min ton, Saatlıda 105,8 min ton, Neftçalada 104,1 min ton, Füzulidə 101,3 min ton, Bərdədə 95,2 min ton, Beyləqanda 95 min ton, Ağsuda 92,6 min ton və Biləsuvarda 91,5 min ton taxıl istehsal olunub. Bu rayonlar ölkədə istehsal olunan taxılın 39%-ni verib.

Bundan başqa, mövsüm ərzində sahələrdən 410 min ton bostan məhsulları, 979,1 min ton kartof, 1 161.7 min ton tərəvəz istehsal edilib. Ötən illə müqayisədə bostan məhsullarının istehsalı 0,5% artıb, kartof istehsalı 9%, tərəvəz istehsalı isə 3,4% azalıb.

Bununla yanaşı, 2009-cu il dekabrın 1-nə təsərrüfatlar tərəfindən 28,3 min ton xam pambıq və 2,6 min ton tütün yarpağı yığılıb ki, bu da ötən ilin göstəricisindən müvafiq olaraq 1,8 dəfə və 4% azdır.

Cari ildə həmçinin 7,6 min hektar sahədə emal üçün şəkər çuğunduru əkilib, hesabat tarixinə 6,5 min hektar sahənin çuğunduru qazılıb və həmin sahələrdən 174,5 min ton məhsul götürülüb.

Meyvəçilik və üzümçülük sahəsinə gəldikdə isə, hesabat dövründə 704,5 min ton meyvə və giləmeyvə, 123,3 min ton üzüm məhsulu, 374,3 ton yaşıl çay yarpağı toplanıb. Ötən illə müqayisədə meyvə və giləmeyvə istehsalı 0,9%, üzüm istehsalı 13,2%, yaşıl çay yarpağının istehsalı isə 21,7% artıb.

Bundan başqa, ötən 11 ay ərzində diri çəkidə 278,8 min ton ət, 1 307,7 min ton süd, 1 080,5 mln. ədəd yumurta və fiziki çəkidə 14,9 min ton yun istehsal edilib. Keçən ilin eyni dövrü ilə müqayisədə ət istehsalı 0,5%, süd istehsalı 3,1%, yumurta istehsalı 9,3% və yun istehsalı 4,6% artıb.

Kənd təsərrüfatının ümumi məhsulunun sabit qiymətlərlə dəyəri keçən ilin müvafiq dövrünə nisbətən 11 ay ərzində 3,3%, o cümlədən heyvandarlıq məhsulları istehsalı 2,4%, bitkiçilik məhsulları istehsalı isə 3,9% artıb.

Qeyd edək ki, hesabat dövründə ölkənin meşəçilik təsərrüfatlarında istehsal edilmiş mal və xidmətlərin faktiki qiymətlərlə dəyəri 1 497 min manat olub. Balıqçılıqla məşğul olan müəssisələr tərəfindən isə 124 min manatlıq balıq ovlanıb.