Aqrar-sənaye kompleksi

Ana səhifə

Bu il Gədəbəy rayonunda 209 min ton kartof yığılıb

18 dekabr 2009 09:36 (UTC +04:00)

Gədəbəy. Ayxan Hüseynov - APA. Bu il Gədəbəy rayonunda ötən ilə nisbətən 9 min ton artıq kartof yığılaraq ümumi məhsul 209 min ton təşkil edib.

APA-nın Qərb bürosunun məlumatına görə, kartof məhsulunun bol olmasına baxmayaraq, əkinçiliklə məşğul olan sakinlər məhsulun qış vaxtında yarısının xarab olduğunu bildirir. Bu, kartof məhsulunu vaxtında sata bilməmələrindən və saxlama şəraitinin pis olmasından irəli gəlir. Sakinlər kartof məhsulunu evlərin zirzəmilərində saxladığından, qış aylarında düşən güclü şaxtalar nəticəsində don vurmuş məhsul yararsız hala düşür.

Gədəbəy rayon İcra Hakimiyyəti başçısının aqrar məsələlər üzrə müavini Rüstəm Nağıyevin APA-nın Qərb bürosuna verdiyi məlumata görə, bu il Gədəbəy rayonunda ümumilikdə 13 000 hektar ərazidə kartof əkilib: “İl ərzində baş vermiş təbii fəlakətlər nəticəsində 500 hektar əkinə ziyan dəyib. Dəmyə şəraitində becərilmiş ekoloji cəhətdən təmiz kartof məhsulunun bir qismi Bakı şəhərində təşkil olunmuş kənd təsərrüfatı yarmarkalarında və iri şəhərlərdə satılır, böyük bir hissəsi isə uyğunlaşdırılmış köhnə anbarlarda saxlanılır. Marketinqin təşkili Gədəbəy rayonunda çox zəifdir. Əkinçiliklə məşğul olan əhali yolun uzaqlığı, nəqliyyat vasitələrinin çatışmazlığı və maddi vəziyyətin çətinliyi səbəbindən kartof məhsulunu satışa çıxarmasından böyük əziyyət çəkir”.

Rüstəm Nağıyev Gədəbəy rayonunda vaxtında satışa çıxarıla bilməyən məhsulun saxlanılması üçün müasir tipli saxlanma anbarlarının tikilməsinə böyük ehtiyac olduğunu bildirib: “Müasir tipli anbarlar olsaydı, saxlanan məhsullar itkiyə getməzdi. Hazırda köhnə uyğunlaşdırılmış anbarlarda saxlanılan məhsulların böyük bir hissəsi xarab olaraq itgiyə gedir”.

Qeyd edək ki, kənd təsərrüfatı məhsullarının saxlanılması üçün müasir tipli saxlama anbarları tikilərsə, Gədəbəy rayonunda daha çox kartof və digər kənd təsərrüfatı məhsulları istehsal edib daxili bazarı tam təmin etmək mümkündür.