Aqrar-sənaye kompleksi

Ana səhifə

Azərbaycanın qərbində Almaniya kapitalının iştirakı ilə iki müəssisə yaradılır

18 dekabr 2009 10:54 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan İnvestisiya Şirkəti (AİŞ) ilə Almaniyanın «RAO AgroMilk» və «RAO Global Group» şirkətləri arasında «Ağstafasüd Kompleksi»nin və «Ağstafa Aqroservis» müəssisəsinin yaradılmasına dair anlaşma memorandumları imzalanıb.

«APA-Economics»in məlumatına görə, sənədləri AİŞ-in icarçı direktoru Əfqan İsayev, «RAO AgroMilk» şirkətinin icraçı direktoru Frits Hofmeister və «RAO Global Group»un icraçı direktoru Slava Afanasyev imzalayıblar.

Tədbirdə çıxış edən Ə.İsayev layihələrin reallaşdırılmasının regionda kənd təsərrüfatının inkişafında xüsusi əhəmiyyət kəsb edəcəyini bildirib və qeyd edib ki, imzalanan sənədlərə əsasən, Ağstafanın Böyük-Kəsik kəndində 4 təsərrüfatı özündə birləşdirəcək «Ağstafasüd Kompleksi»nin və rayonun Səməd Vurğun qəsəbəsində «Ağstafa Aqroservis» müəssisəsinin yaradılması nəzərdə tutulur: «Layihəyə görə, «Ağstafasüd Kompleksi»ndə gündə 50 ton süd istehsal olunacaq, ilk iki ildə 5 çeşiddə sterilizə olunmuş süd, yoqurt, xama kimi məhsullar hazırlanacaq. Ümumiyyətlə, kompleksdə ildə 18 mln. litrdən artıq süd məhsullarının istehsalı, həmçinin südlük, ətlik və damazlıq heyvanların yetişdirilməsi nəzərdə tutulur. Müəssisənin fəaliyətinin üçüncü ilindən isə kompleksdə kərə yağı və digər heyvandarlıq məhsullarının istehsalına başlanacaq».

Ə.İsayev onu da qeyd edib ki, kompleksin inşasına 2010-cu ilin birinci rübünün sonunda başlanacağı gözlənilir və artıq 2011-ci ilin eyni dövründə kompleks istifadəyə veriləcək – müəssisədə 130 daimi iş yeri açılacaq. «İlkin hesablamalara görə, ləyihənin ümumi dəyəri 30 mln. avro təşkil edəcək ki, bunun 5 mln. avrosu ilkin nizamnamə kapitalı olacaq və bu məbləğin 4 mln. avrosunu xarici investisiyalar təşkil edəcək, 1 mln. avronu isə AİŞ ayıracaq. Digər 25 mln. avro isə Avropa banklarından və kredit agentliklərindən cəlb olunacaq. Nizamnamə kapitalında AİŞ-in payı 20% təşkil edəcək», - deyə Ə.İsayev bildirib.

«Ağstafa Aqroservis» müəssisəsinin yaradılmasında gəldikdə isə, Ə.İsayev qeyd edib ki, layihənin ümumi dəyəri 3 mln. avro təşkil edir və bu məbləğin 25%-ni AİŞ ayıracaq, digər hissəsi isə xarici investorlardan cəlb olunacaq. Müəssisənin nizamnamə kapitalı 1 mln. avro təşkil edəcək: «Müəssisənin inşasına gələn ilin ilk rübünün sonunda başlanacaq və artıq altı aydan sonra «Ağstafa Aqroservis» istifadəyə veriləcək. Müəssisədə 17 daimi iş yeri açılacaq».

Qeyd edək ki, «Ağstafasüd Kompleksi»nin hazırlanmasını və tikintiyə nəzarəti Almaniyanın «Wolf System», «SHS Architecture-Engineering Managment» şirkətlərinin mütəxəssisləri, Azərbaycan tərəfindən isə «Azərmemarlayihə» Dövlət Baş Layihə İnstitutunun mütəxəssisləri həyvata keçirəcək.