Aqrar-sənaye kompleksi

Ana səhifə

Azərbaycan, Gürcüstan və Ermənistan birgə şərab brendi yaradır

30 dekabr 2009 10:56 (UTC +04:00)

APA-nın məlumatına görə, bu barədə Gümrü İnkişaf Fondunun icraçı direktoru, Qafqaz Biznes və İnkişaf Şəbəkəsinin Ermənistan ofisinin rəhbəri Artuş Mkrtçyan “Delovoy Ekspress” qəzetinə müsahibəsində bildirib.

A. Mkrtıçyanın sözlərinə görə, “Qafqaz Buketi” layihəsi Böyük Britaniyanın “International Alert” və ABŞ-ın Ermənistandakı səfirliyinin maliyyə dəstəyi ilə “Biznes və münaqişə” proqramı çərçivəsində həyata keçirilir. Layihənin Ermənistandakı birbaşa icraçısı Gümrü İnkişaf Fondu ilə Qafqaz Biznes və İnkişaf Şəbəkəsinin Ermənistan ofisidir.

A. Mkrtçyan qeyd edib ki, yekunda Ermənistan şərabçıları tərəfindən təqdim olunmuş 17 ağ və qırmızı şərab, Gürcüstan şərabçılarının 13, Azərbaycan şərabçılarının isə 9 markası seçilib. Təşkilat rəhbəri vurğulayıb ki, layihəyə cəlb olunmuş ölkələrdən birinin iştirakı olmadan “Qafqaz Buketi” ideyası əhəmiyyətini itirəcək. Ona görə də biz Azərbaycanın baş nazirinə məktub hazırlayırıq ki, Bakıda keçiriləcək təqdimat mərasimlərində Ermənistan şərablarının və şərabçılarının iştirakına icazə verilsin.

Azərbaycan Nazirlər Kabinetindən APA-ya «Qafqaz buketi» adlı brendin Bakıda təqdimatının keçirilməsi barədə Azərbaycan hökumətinə hər hansı müraciətin olmadığı bildirilib.

Azərbaycan Elmi-Tədqiqat Üzümçülük və Şərabçılıq İnstitutunun direktoru Tariyel Pənahov isə məsələ ilə bağlı APA-ya bildirib ki, «Qafqaz Buketi» brendinin yaradılması ilə bağlı məsələ hələ bir neçə il əvvəl gündəmə gəlib. Bununla bağlı Gürcüstanda görüş keçirilib və müzakirələr aparılıb. Ümumilikdə bu cür birgə layihələrin həyata keçirilməsini mümkün sayan T. Pənahovun sözlərinə görə, hazırda bu istiqamətdə danışıqların getməsi barədə məlumatlar da var: «Birgə brend yaratma məsələsi dərindən araşdırılmalı, eyni zamanda elmi cəhətdən də əsaslandırılmalıdır. İkinci məsələ ölkələrdən seçilən brendlərin sayı ilə bağlıdır. Anlamaq mümkün deyil ki, niyə Azərbaycandan 9, Gürcüstandan 13, Ermənistandan isə 17 şərab növü seçilir. Əslində, Azərbaycanın potensialı Ermənistan və Gürcüstanınkından dəfələrlə böyükdür. Dünyada tanınmış şərab brendlərimiz də var».

İnstitut rəhbəri hesab edir ki, əslində bu təklif Azərbaycan tərəfindən irəli sürülməliydi. T. Pənahovun fikrincə, siyasi cəhətdən hazırkı şəraitdə müştərək brendin yaradılması mümkün görünməsə də Azərbaycan belə bir təşəbbüsü dəstəkləməlidir: «Amma bir problem də var. Tarixən saxtakarlığa vərdiş etmiş Ermənistanın keyfiyyətli Azərbaycan məhsullarını saxtalaşdırmayacağına zəmanət yoxdur. Bu amil də nəzərə alınmalıdır».