Aqrar-sənaye kompleksi

Ana səhifə

Qubada xaricdən gətirilən alma yerli almadan baha satılır

11 yanvar 2010 21:23 (UTC +04:00)

Quba. Könül Abdullayeva – APA. Tarixən alması ilə tanınan Qubada indi xarici almaların satışı üstünlük təşkil edir.

APA-nın şimal bürosunun məlumatına görə, görünüşü ilə diqqəti cəlb edən xarici alma yerli almadan baha satılır. Quba bazarında İran, Türkiyə, Gürcüstan və digər ölkələrdən gətirilən xarici sort almanın kiloqramı 3 manatdan başlanan qiymətlərlə tənzimlənir. Yerli sort alma isə (cırhacı, sinab, qızıləhmədi və s.) 20 qəpikdən 2 manatadək olan qiymətlərlə satılır.

Bağbanlar yerli almanın ucuz satılmasından narazıdır. Bazarda meyvə satışı ilə məşğul olanlar bunun səbəbini alıcının daha iri və yaraşıqlı meyvəyə üstünlük verməsi ilə əlaqələndirirlər. Belə ki, satışa çıxarılan yüksək keyfiyyətli yerli sort alma zahiri görkəminə görə xarici alma ilə rəqabətdə uduzur.

Problemi araşdıran Quba Regional Aqrar Elm Mərkəzindən APA-ya verilən məlumata görə, əslində Quba-Xaçmaz regionunda yetişdirilən almaların əksər hissəsi heç də yerli sorta aid deyil. Belə ki, ötən əsrin 70-ci illərində salınan bağlarda həmin dövr üçün rəqabətə davamlı olan Amerika və Avropa sortları yetişdirilib. Bu sortlar da artıq dünya bazarında alıcılıq qabiliyyətini itirib. Nisbətən az becərilən sırf yerli sortlar isə keyfiyyətinə görə yüksək olsa da, xarici görünüşü ilə o qədər də cəlbedici deyil.

Yerli meyvə sortlarını bir qədər də təkmilləşdirmək, bazarda rəqabətə davamlı olan məhsulu yetişdirmək üçün Azərbaycan Kənd Təsərrüfatı Nazirliyi ilə Fransanın Laore Kənd Təsərrüfatı Palatası “FRAZER” layihəsini həyata keçirir. Layihə əsasında respublikamıza 13 növ yeni alma sortu və yerli sortlarla calaq etmək üçün virussuz calaqaltılar gətirilib. “FRAZER” layihəsi əsasında Quba-Xaçmaz zonasında 500 hektar yeni meyvə bağının salınması davam edir.