Asiya

Ana səhifə

Asiya

Tiflisdə “Güney Qafqaz, Moldova və Ukraynada KİV azadlığına çağırış” mövzusunda konfrans keçirilir

15 aprel 2010 19:03 (UTC +04:00)

Tiflis. Nizami Məmmədzadə-APA. Bu gün Gürcüstan paytaxtının “Mariot Tbilisi” mehmanxanasında “Güney Qafqaz, Moldova və Ukraynada KİV azadlığına çağırış” mövzusunda ikigünlük konfrans işinə başlayıb.

APA-nın Gürcüstan bürosunun məlumatına görə, konfrans İsveçrənin AŞ Nazirlər Komitəsinə sədrliyi çərçivəsində təşkil olunub. Konfransda Azərbaycan, Gürcüstan, Ermənistan ölkələri, Moldova və Ukraynada jurnalistlərin təhlükəsizliyi və müdafiəsi, söz azadlığının təminatı sahəsində problemlər müzakirə olunur. Tədbiri Gürcüstan XİN David Çalağaniya açıb.

Konfransda Gürcüstandakı İsveç səfiri Lorentso Amberq, ATƏT-in mətbuat və söz azadlığı üzrə yeni təyin olunmuş xüsusi nümayəndəsi Dunya Miyatoviç, Avropa İttifaqının ictimai informasiya və cinayətkarlığa qarşı mübarizə departamentinin direktoru İvan Koedjikov çıxış ediblər.

Səhər saatlarında konfransın birinci sessiyası keçirilib. Sessiyada Açıq Cəmiyyət İnstitutunun KİV-də siyasi məsələlər barədə internetdən istifadə üzrə redaktoru Mark Tompsonun “Demokratik cəmiyyətdə KİV-ə azadlıq” mövzusunda məruzəsi dinlənilib. Sonra jurnalistlər və ekspertlərlə “Jurnalistlərin müdafiəsi” mövzusunda müzakirələr aparılıb.

Müzakirələrdə hüquqi və inzibati təqiblərdən müdafiə, jurnalistlərə təzyiq edən şəxslərin məhkəməsinin yubanmadan keçirilməsi, jurnalistlərin məlumat mənbəyinin və jurnalist yazılarının müdafiəsi; mənbədən informasiya almaq üçün azad hüquqi kömək, sözü və informasiyanı azad çatdırmaq qarantiyası, eyni zamanda qanun çərçivəsində terrorizmlə mübarizə məsələləri müzakirələrin əsas obyekti olub.

Müzakirələrdə Avropa Jurnalistlər Assosiyasiyasının Britaniya şöbəsinin KİV azadlığı üzrə nümayəndəsi Uilyam Horsli sədrlik edib. Müzakirələrdə Gürcüstan parlamentinin deputatı Maqdalina Anikaşvili, Azərbaycandan İREX-in hüquqşünası Ələsgər Məmmədli, Moldova parlamentinin təhsil, mədəniyyət və KİV məsələləri üzrə komissiyanın prezidenti Korina Fusu, Azərbaycan prezident administrasiyasının nümayəndəsi Vüqar Əliyev və başqaları çıxış ediblər.

İkinci sessiyada “Yeni kommunikasiya texnologiyası, yeni çağırışlar; KİV-də gedən dəyişikliklər və onların təsiri” mövzusunda Avropa Şurasının yeni dəstək əlaqələri (CDMC) və KİV üzrə rəhbərlik komitəsinin üzvü, beynəlxalq informasiya cəmiyyətinin əlaqələndiricisi Tomas Şnayder məruzə ilə çıxış edib. Məruzə ətrafında diskussiyalar olub.

Sonra konfransın ilk gününə yekun vurulub.

Aprelin 16-da davam edəcək beynəlxalq konfransda ekspertlərin iştirakı ilə diffomasiya və etika, müasir professionallıq, cəmiyyətdə olan böhran müddətlərində, seçkiyə qədər və seçkidən sonra, konflikt və konflikt situasiyasından sonra KİV-in barışdırıcı alət kimi fəaliyyəti, KİV-in milli-regional və beynəlxalq səviyyələrdə olan rolundan danışılacaq, sonda tövsiyələr qəbul olunacaq.

APA-nın məlumatına görə, sabah konfransın aparıcısı ATƏT-in mətbuat və söz azadlığı üzrə yeni təyin olunmuş xüsusi nümayəndəsi Dunya Miyatoviç olacaq.
Dunya Miyatoviç bu günkü çıxışında bildirib ki, biz qanunları görürük, onlar kağız üzərində qalır və işləmir. “Biz jurnalistlərin müdafiə və azadlıq məsələsini həmişə qaldıracağıq. Mən bu mövzuda həmişə kəskin çıxışlar edəcəyəm. Jurnalistlərin müdafiəsi üçün həmişə qapıları döyəcəyəm. Biz düzük.”

Qeyd edək ki, Tiflisdə keçirilən beynəlxalq konfransda Azərbaycan prezident administrasiyasının media məsələləri üzrə bölmənin rəhbəri Vüqar Əliyev, Mətbuat Şurasının sədri Əflatun Amaşov, Milli Televiziya və Radio Şurasının sədri Nuşirəvan Məhərrəmli, media şöbəsinin müdiri Rəşad Hacılı, Azərbaycan İnternet Forumunun prezidenti Osman Gündüz, İREX-in hüquqşünası Ələsgər Məmmədli iştirak edir.

Azərbaycan prezident administrasiyasının mətbuat və informasiya orqanları ilə iş bölməsinin müdiri Vüqar Əliyev APA-ya açıqlamasında bildirib ki, bu tədbir əsasən söz və məlumat azadlığının müdafiəsi mexanizmlərinin müzakirəsi ətrafında keçirilən konfransdır. “Burada daha çox ifadə azadlığının daha effektiv təmin olunması üçün zəmanətlərə dəstək göstərilməsi nəzərdə tutulur və ümumilikdə tədbirdə Güney Qafqaz ölkələrində, eyni zamanda Ukraynada və Moldovada KİV-in vəziyyəti, əldə olunmuş nailiyyətlər, mövcud problemlər və həmin problemlərin həlli üçün daha effektli mexanizmlərin formalaşdırılması, çıxış yollarının tapılması məsələləri müzakirə olunur. Tədbir çərçivəsində hər bir ölkədə KİV-in vəziyyətinə dair fikirlər, məruzələr səsləndirildi və həmin məruzələrdə əldə olunmuş nailiyyətlərlə yanaşı, mövcud problemlər də vurğulandı və təbii ki, Azərbaycanda söz və məlumat azadlığının vəziyyəti, bu dövrə kimi əldə olunmuş uğurlar, keçdiyimiz inkişaf yolu və mövcud çatışmazlıqlar və onların həlli istiqamətində Azərbaycan dövlətinin gördüyü və nəzərdə tutduğu işlər barədə məlumat verildi. Mən öz çıxışımda bir sıra vacib məsələlərə münasibət bildirdim və Azərbaycanda KİV-in vəziyyəti ilə bağlı daha real təsəvvürün yaradılması üçün imkanlar daxilində səylərimizi göstərdik.”