Asiya

Ana səhifə

Asiya

Sabah Əfqanıstanda parlament seçkiləri keçiriləcək

17 sentyabr 2010 14:42 (UTC +04:00)

Bakı-APA. Ötən il xeyli mübahisələrə səbəb olmuş prezident seçkilərindən bir il sonra sentyabrın 18-də Əfqanıstanda parlament seçkiləri keçiriləcək. APA-nın Türkiyə KİV-lərinə istinadən verdiyi məlumata görə, seçkilərin təhlükəsizliyini koalisiya ordusunun 140 minə qədər əsgəri təmin edəcək. Seçkiləri yaxından izləyən Qərb ölkələri seçkilərin təhlükəsiz və normal keçməsi üçün küllü miqdarda vəsait də ayırıb. Seçki hazırlıqları üçün Türkiyə də bu ölkəyə 2 milyon dollar yardım edib.

Taliban yaraqlılarının təhdidləri seçkiqabağı təbliğat kampaniyasının normal keçirilməsinə ciddi maneələr yaradıb. Paytaxt Kabulda namizədlərin təşviqat vərəqələrini asmağa yer tapılmadığı halda, əyalətlərdə bir çox namizəd təhlükəsizlik səbəbilə seçki kampaniyasını keçirə bilməyib. Ölkənin cənubunda Taliban təhdidinə görə bir çox seçki mərkəzinin açılmayacağı da bildirilir.

Seçkilərin Qərb standartlarına görə azad və ədalətli keçirilməsi şübhəli görünür. BMT Baş katibinin Əfqanıstan təmsilçisi Steffan Mistura bu seçkilərdə keçənilki seçkilərə nəzərən daha az saxtakarlıq olacağına ümid etdiyini bildirib. Əfqanıstan Siyasi Araşdırmalar Mərkəzinin rəhbəri Harun Mir isə “ədalətli və şəffaf” deyil, “məqbul” seçki gözlədiklərini söyləyib. NATO-nun Əfqanıstan təmsilçisi Mark Sedvill isə seçki hazırlıqlarının keçənilki seçkilərlə müqayisədə daha yaxşı aparıldığını deyib.

Seçkidə 249 mandat uğrunda 2500-dən artıq namizəd mübarizə aparacaq. Namizədlər arasında 400-ə qədər qadın da yer alib. Qadın namizədlərin siyahısında ölkəsini 2004-cü il Afina və 2008-ci il Pekin Yay Olimpiya Oyunlarında təmsil etmiş Rubina Cəlali də var. Heç bir siyasi və etnik qrupa daxil olmayan R. Cəlali xalqının duyğularını anlayan bitərəf təmsilçi olmaq istədiyini bildirib. Sabah keçiriləcək seçkiləri 300 mindən artıq müşahidəçi izləyəcək.