Asiya

Ana səhifə

Asiya

Səkinə Əştiyani ilə bağlı son qərar hələ çıxarılmayıb

29 sentyabr 2010 01:29 (UTC +04:00)

Bakı-APA. İranın Xarici İşlər Nazirliyinin nümayəndəsi bildirib ki, nikahdankənar əlaqələrdə və ərinin qətlində iştirakda ittiham edilərək daşqalaq olunmağa məhkum edilmiş Səkinə Məhəmmədi Əştiyani barədə son qərar hələ verilməyib.
APA-nın bbc.com saytına istinadən verdiyi xəbərə görə, bundan bir qədər əvvəl onun asılaraq və ya daşqalaq edilərək edam ediləcəyi barədə ziddiyyətli xəbərlər yayılmışdı. Lakin gündəlik brifinqi zamanı İran Xarici İşlər Nazirliyinin nümayəndəsi Ramin Mehmanpərəst deyib ki, Əştiyani barəsində iş hələ başa çatmayıb:
"Hazırda iki məsələyə baxılır. Birincisi onun qətldə iştirakı məsələsidir, ikincisi isə onun bu sənədlərdə adları yazılmış müxtəlif fərdlərlə nikahdankənar cinsi əlaqələridir. Hazırda biz onun qətldə iştirakı məsələsini araşdırırıq. Bütün proseduralar hələ başa çatmayıb və tam ittihamnamə bütün bu işlər başa çatdıqdan sonra açıqlanacaq."
Bu gün İranda nikahdankənar cinsi əlaqədə ittiham olunaraq daşqalaq edilməyə məhkum edilmiş Səkinə Məhəmmədi Əştiyaninin taleyi ilə bağlı narahatlıq var. Xarici İşlər Nazirliyinin nümayəndəsi onun daşqalaq və ya asılma yolu ilə edam ediləcəyi barədə bundan əvvəl yayılmış xəbərləri təkzib edib.
Səkinə Məhəmməd Əştiyani barədə Tehrandan gələn ziddiyyətli xəbərlər onunla bağlı beynəlxalq təzyiqlərə necə cavab vermək ətrafında İranın yuxarı eşelonlarında səhnə arxasında gedən mümkün prosesləri göstərir.
Adətən etibarlı sayılan iki agentlik onun mümkün taleyi barədə iki bir-birinə zidd məlumat yayıb.
Agentliklərdən biri baş prokurora istinadən bildirib ki, Əştiyani ərinin qətlinə görə asılaraq edam olunacaq, digər agentlik isə xəbər verir ki, onun nikahdankənar əlaqələrə görə daşqalaq ediləcəyi barədə məlumat təsdiqlənib.
İndi isə Xarici İşlər Nazirliyinin sözçüsü bildirir ki, bütün hüquqi proseduralar hələ başa çatmayıb, lakin bununla belə Səkinə Əştiyaninin qətldə iştirakı sübut edilib.
Səkinə Əştiyaninin vəkilləri onun günahsız olduğunda israrlıdırlar.
Prezident Mahmud Əhmədinejad isə deyib ki, bu məsələ ətrafında yaranmış ziddiyyət Qərb təbliğatının nəticəsidir və Səkinə Əştiyani barədə daşqalaq hökmü heç vaxt çıxarılmayıb.