Asiya

Ana səhifə

Asiya

Mübariz Əhmədoğlu: “İsrail özünün ən böyük reklamçısı olan İranın mövcudluğunda maraqlıdır”

06 avqust 2012 10:18 (UTC +04:00)

İsraildən qorxu İranın bütün daxili və xarici siyasətini müəyyənləşdirir

Bakı-APA. ““Hizbullah” qeyri-sabit Livanda yaradılmış, İranın dövlət maraqlarına xidmət edən təşkilatdır. Bəziləri bunu terrorçu təşkilat hesab etdiyi halda, digərləri belə hesab etmir. “Hizbullahın” Livanda fəaliyyət göstərməsi üçün Livanda vəziyyətin xaotik olması vacib şərtdir. Ona görə İran Livanın xaotik vəziyyətdə qalmasında maraqlıdır”. APA-nın məlumatına görə, bu fikirlər politoloq Mübariz Əhmədoğluna məxsusdur.

Onun sözlərinə görə, “Hizbullahın” mövcudluğu təkcə şiələrə İranın dəstək verməsi anlamında başa düşülməməlidir: ““Hizbullah” İranın başqa bir dövlətin ərazisindəki dövlət maraqlarının daşıyıcısı və təsdiqidir. Dövlət marağı din marağını üstələdiyi üçün İran Fələstin məsələsini əlində bayraq edib. İranın siyasətinin ziddiyyətliliyinin biri də burdadır. İran elə başa düşür ki, o İsrailin qonşuluğunda hərbi və ya casus bazası yaradıbsa İsrail də İranın qonşuluğunda belə baza yaradacaqdır. İsrailin İranın qonşuluğunda belə baza yaratmaması üçün Livan kimi qeyri-sabit dövlətlər İranın qonşuluğunda olmamlıdır. İran isə qonşularına yeni təhdidlər yaratmaqla qeyri-sabitlik yaratmaq istəyir. Azərbaycan Livan deyil. Buradakı vəziyyəti nə İran, nə də ki, İsrail öz maraqlarına uyğun dəyişə bilməyəcəklər.

İsrail İran üçün qorxulu deyil və qorxulu ola da bilməz. Çünki nəinki İsrail dövlətinin, hətta, yəhudi xalqının bütün tarix boyu İran böyüklükdə təbliğatçısı olmayıb. Antitəbliğat təbliğatın bir növüdür. İranın vaxtilə İsraildən aldığı hərbi təyyarələrin böyük bir qisminin ehtiyat hissələri indinin özündə də gizli müqaviləyə əsasən İsraildən Türkiyə vasitəsilə İrana gətirilir. Azsaylı, amma həyati zəruri məhsullar da İsraildən İrana gətirilir. Yəhudi jurnalistləri “Armageddona qarşı casuslar” kitabının əvəzinə “İran müsəlmanları ərəb müsəlmanlarına qarşı İsrailin nökərçiliyində” adlı cild-cild kitablar yazmış olardılar. “İranqeyt” lə bağlı İsraildə heç nə açıqlanmırsa, deyilmirsə, deməli İsrail İrana qarşı mübarizə aparmır. İranın düşməni İsrail deyil. Yuxarıda deyildiyi kimi İran yəhudi millətinin ən böyük təbliğatçısıdır. İranın düşməni özüdür. İran təkcə özünün yox, bütünlükdə müsəlmanların düşmənidir. Şiələr İranın düşmənləri içərisində xüsusi yer tutur. Şiələrin, müsəlmanların maraqlarını guya müdafiə edir. Əslində isə onlara problem yaradır. Bunun üçün ilk öncə İran həmin şiələri zombiləşdirir. Qeyri-sabit Livanda “Hizbullah”ı yaratmazdan əvvəl bir qrup şiəni zombiləşdirdi. İndi Livandakı şiələr şüurlu şəkildə İranı seçiblər. Onlar üçün başqa heç bir yol yoxdur. Fələstin məsələsinin həlli bəlkə də vəziyyəti dəyişə bilərdi. İran Fələstin məsələsinin həllində maraqlı deyil. BMT-də Fələstin dövlətçiliyi məsələsi müzakirə olunarkən İran ABŞ və İsrail kimi müstəqil Fələstin dövlətinin yaradılmasının əleyhinə çıxdı. Guya Fələstin dövləti 1967-ci deyil, 1948-ci il sərhədlərində yaradılmalıdır. Amma hamı bilir ki, 1967-ci il sərhədlərindəki Fələstin dövlətinin yaradılması 1948-ci il sərhədlərindəki Fələstin dövlətinin yaradılması üçün zəruri addımdır. Eyni vəziyyəti İran Azərbaycan Respublikasında da arzulayır.

Azərbaycanda İrana sitayiş edən bir qrup adamın davranışlarına baxanda başa düşürsən ki, onlar şüurlu şəkildə din və İran seçimi qarşısında İranı seçiblər. Onların fikrincə, dinə yox, məhz İrana xidmət etməklə həm bu dünyanı, həm də o biri dünyanı qazanmaq olar. Həmtəriqətçilərini bu qədər incitmək yalnız İrana xas olan keyfiyyətdir. Əhalini toyuq ətinə və bir azdan daha zəruri tələbat malına həsrət qoya-qoya dünyanın başqa yerindəki şiələri də bu vəziyyətə salmağa çalışmaq yalnız İrana məxsus keyfiyyətdir.

İran ABŞ-ı, Qərbi nəzərə almadan, onların imkanlarını şişirtmədən öz müstəqil siyasətini qurmalı və aparmalıdır. ABŞ-ın və İsrailin İrana qarşı apardığı siyasətin təhlilindən gəldiyimiz nəticə budur ki, onlar çox asanlıqla İranın rəhbərliyindən özlərinə lazım olan reaksiyanı ala bilirlər. Çox sadə üsulldan istifadə etməklə ABŞ və İsrail asanlıqla İranı idarə edirlər.

İranlıların ali dini liderinin adı dünya mətbuatında son vaxtlar tez-tez hallandırılır. İndiki kontekstdə bu, o deməkdir ki, Qərbin hazırladığı İranı idarəetmə texnologiyaları iranlıların ali dini liderinin şəxsi davranışı üzərində qurulub. Bu isə onların iranlıların ali dini liderini hərəkətləri, davranışları, maneraları haqqında daha çox məlumata malik olduğunun göstəricidir. Yəqin ki, iranlıların ali dini liderinin ətrafında özlərinin adamları var. Əgər bu texnologiyaları hazırlayıbsalar, deməli, məsələ yaxın vaxtlarda bitməyəcək. Qərblilər bu texnologiyanı İranda onlara lazım olan vəziyyət alanadək davam etdirəcək”.