Almaniyanın paytaxtı Berlində “Gen Z regelt” (“Z nəsli qərar verir”) gənclər hərəkatının təşkil etdiyi nümayiş zamanı 22 nəfər müvəqqəti saxlanılıb.
APA xəbər verir ki, Berlin polisinin “X” sosial şəbəkəsində yaydığı məlumata görə, aksiya şəhərin Şarlottenburq rayonunda keçirilib.
Nümayişdə təxminən 1200 nəfər iştirak edib. Halbuki təşkilatçılar əvvəlcədən aksiyaya 100 nəfərin qatılacağını bildirmişdilər.
Polisin məlumatına görə, ictimai asayişin pozulması, zorakılıq, hüquq-mühafizə orqanlarına müqavimət və partlayıcı maddələrlə bağlı qaydaların pozulması şübhəsi ilə 13 iş başlanılıb.
Etirazçılar pirotexniki vasitələrdən istifadə edib və polis kordonunu yarmağa çalışıblar. Hüquq-mühafizə orqanları nümayişçiləri geri çəkilməyə məcbur etmək üçün güc tətbiq edib.
Qarşıdurmalar nəticəsində iki polis əməkdaşı xəsarət alıb.
Analoji aksiyalar Almaniyanın digər şəhərlərində də keçirilib. Bremendə təxminən 670, Düsseldorfda isə 100 nəfər nümayişə qatılıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
