BMT-nin insan hüquqları üzrə ekspertləri Fransada tələbə etirazlarının dağıdılması zamanı həddindən artıq güc tətbiq edilməsini, zorakılığı və kütləvi həbsləri pisləyiblər.
APA xəbər verir ki, bu barədə BMT-nin İnsan Hüquqları üzrə Ali Komissarlığının İdarəsinin (OHCHR) məlumatında bildirilib.
Ekspertlər qeyd ediblər ki, hüququn aliliyinə əsaslanan dövlətdə sosial etirazlara həddindən artıq güc tətbiqi, zorakılıq və kütləvi həbslərlə cavab verilməsi yolverilməzdir.
Onların sözlərinə görə, Fransada orta məktəb və universitet tələbələri təhsil sisteminin normal fəaliyyət göstərməsi, təhsil üçün münasib şəraitin yaradılması, məktəb və universitetlərin dərs cədvəllərinin təkmilləşdirilməsi, eləcə də keyfiyyətli təhsilə bərabər çıxış imkanlarının təmin olunması tələbi ilə etiraz edirlər.
Ekspertlər bildiriblər ki, 2026-cı ilin sentyabr ayının ortalarından başlayan etirazlar əvvəlcə məktəbliləri əhatə edib, daha sonra universitet tələbələri də aksiyalara qoşulublar. Onların fikrincə, hakimiyyətin təhlükəsizlik tədbirlərinə üstünlük verməsi etirazların əsas səbəblərinin arxa plana keçməsinə gətirib çıxarıb.
BMT ekspertləri hüquq-mühafizə orqanlarının əməliyyatları zamanı yetkinlik yaşına çatmayan nümayişçilərin ağır, bəzi hallarda isə geri dönməz xəsarətlər almasını qəbuledilməz adlandırıblar.
Onlar həmçinin əsasən yetkinlik yaşına çatmayanlar olmaqla, bir neçə min nəfərin saxlanılmasının miqyasının qeyri-mütənasib göründüyünü və bunun insanların ifadə azadlığı, dinc toplaşmaq hüququndan istifadə etməsinə mane ola biləcəyini bildiriblər.
Ekspertlər polis əməkdaşlarının xəsarət almasını, binalara ziyan vurulmasını və mağazaların dağıdılmasını da pisləyərək, bu halların araşdırılmasına və məsul şəxslərin ədalət qarşısında cavab verməsinə çağırıblar.
BMT nümayəndələri Fransa hakimiyyətini polis fəaliyyətinin təşkili və etirazların idarə olunması üsullarına yenidən baxmağa, nümayişçilərin öz narahatlıqlarını dinc şəkildə ifadə edə bilməsi üçün şərait yaratmağa çağırıblar.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
