Digər xəbərlər

Ana səhifə

Digər xəbərlər

Azərbaycanın işğal olunmuş ərazilərində narkotik plantasiyaları salınıb

27 iyun 2007 09:38 (UTC +04:00)

“Dağlıq Qarabağda və Azərbaycanın işğal olunmuş ərazilərində narkotik vasitələrin becərilməsi, qanunsuz dövriyyəsi ilə bağlı məsələlər Azərbaycan hökuməti tərəfindən bütün beynəlxalq təşkilatlar qarşısında qaldırılıb”. APA-nın məlumatına görə, bunu Nazirlər Kabinetinin hərbi və inzibati orqanlarla iş şöbəsinin müdiri Əzim Piriyev deyib. Onun sözlərinə görə, işğal olunmuş ərazilərdə narkotik vasitələrinin becərilməsi və ixracı ilə bağlı məsələlər rəsmi təsdiqini tapıb və bununla bağlı cinayət işləri qaldırılıb: “İşğal olunmuş ərazilərdə narkotik plantasiyaları salınıb. İrandan ora külli miqdarda narkotik vasitə daxil olur və oradan Rusiya, Avropa ölkələrinə ixrac edilir. Biz beynəlxalq təşkilatlar qarşısında tələb qoymuşuq ki, həmin ərazidə monitorinq aparsınlar. Amma bu təşkilatlar söz versələr də, hər hansı monitorinq aparmırlar”. Ə. Piriyev həmçinin, qeyd edib ki, Azərbaycana narkotik vasitələr Əfqanıstandan İran vasitəsi ilə idxal olunur: “İranla 130 km sərhədin Azərbaycanın nəzarətində olmamasına görə həmin ərazilərdə narkotiklərə qarşı mübarizə aparmaq mümkün deyil”. /APA/