İnfrastruktur

Ana səhifə

İnfrastruktur

“Elektron hökumət” portalına qoşulmalı olan informasiya sistemləri və ehtiyatlarının ilkin siyahısı hazırlanıb

30 iyun 2014 13:04 (UTC +04:00)

Bakı. Aynur Əliyeva - APA-Economics. Azərbaycan Respublikası Nazirlər Kabinetinin 1 may 2014-cü il tarixli 118 nömrəli qərarı ilə “Elektron hökumət” portalına qoşulmalı olan informasiya sistemlərinin və ehtiyatlarının Siyahısı” təsdiq edilib. Bu qərar portalın səmərəli fəaliyyəti və inkişafına bilavasitə təsir göstərəcək.

Rabitə və Yüksək Texnologiyalar Nazirliyindən “APA-Economics”ə verilən məlumata görə, bununla əlaqədar, qurumun Məlumat Hesablama Mərkəzinin (MHM) təşəbbüsü ilə iyunun 3-də Ədliyyə Nazirliyində, iyunun 4-də isə Əmlak Məsələləri Dövlət Komitəsində (ƏMDK) keçirilmiş birgə görüşlərdə portala inteqrasiya edilməli servislərin ilkin siyahısı hazırlanıb. Ədliyyə Nazirliyi və ƏMDK tərəfindən servislər hazırlanıb təqdim edildikdən sonra, həmin servislərin qısa müddət ərzində portal üzərindən aidiyyəti qurumlara qoşulması MHM tərəfindən təmin ediləcək. Digər qurumlarla da analoji tədbirlərin həyata keçirilməsi və qeyd olunan qərarın icrasının mümkün qədər qısa zamanda başa çatdırılması planlaşdırılır.

Dövlət qurumları tərəfindən müvafiq servislər hazırlanıb portala inteqrasiya olunduqdan sonra, vətəndaşların elektron xidmətlərdən istifadə zamanı sənədlərin skan edilərək portala göndərilməsi zərurəti aradan qalxacaq. Belə ki, vətəndaşın portalda audentifikasiya (loqin-parol, e-imza və s. vasitələrlə) olunması kifayət edəcək ki, ona aid sənədlər aidiyyəti dövlət qurumlarının məlumat bazasından avtomatik əldə olunsun.

Ümumiyyətlə, bu proses başa çatdıqdan sonra dövlət qurumları e-xidmətlərin göstərilməsi zamanı digər qurumların informasiya sistemlərindən “Elektron hökumət” portalı vasitəsilə lazımi məlumatı onlayn rejimdə əldə edə biləcəklər və bununla da əhaliyə göstərilən e-xidmətlərin elektronlaşma səviyyəsi, çeşidi və keyfiyyəti yüksəlmiş olacaq. Nəticədə əhalinin “Elektron hökumət” portalından daha səmərəli istifadəsi üçün şərait yaranmış olacaq, onların portaldan istifadəyə marağı isə daha da artacaq.