Daxili siyasət

Ana səhifə

Daxili siyasət

Azərbaycan müxalifəti geniş koalisiya yaratmaq barədə düşünür

04 avqust 2008 10:44 (UTC +04:00)

Bakı. Elnur Məmmədli - APA. “Müxalifət partiyalarının prezident seçkilərində iştirak etməmək barədə qərarından sonra bu düşərgənin geniş koalisiyasını yaratmaq mümkündür. Hesab edirəm ki, bu barədə ciddi müzakirələr başlamalıdır”. Bunu APA-ya açıqlamasında “Azadlıq” blokunun Sədrlər Şurasının üzvü, Milli Birlik Hərəkatının lideri Lalə Şövkət deyib. Onun sözlərinə görə, hazırda müxalifətin meydanının kifayət qədər dar olmasına baxmayaraq, ümumi prinsiplər üçün birgə addımlar atılmalıdır. L. Şövkət Müsavat, ADP, KXCP və digər partiyaların seçki ilə bağlı qərarlarının doğru olduğunu qeyd edib: ““Azadlıq” bloku hələ yarım il əvvəl demokratik seçki yaranmayacağı halda, seçkilərdə iştirak etməyəcəyini bildirib. Milli Məclis qanuna dəyişiklik edəndən sonra qərarımızı rəsmiləşdirib boykotla çıxış etdik. Bu gün artıq bütün müxalifət seçkiləri boykot edir. Bu, çox düzgün qərardır, amma bir qədər gecikib. Qərar qanuna dəyişiklikdən dərhal sonra qəbul edilsəydi, daha səmərəli olardı”.
Müsavat Partiyasının Mərkəzi İcra Aparatının rəhbəri Arif Hacılı APA-ya bildirib ki, seçki prosesində Seçki Məcəlləsinə uyğun bütün mümkün addımlar atılacaq: “Biz müşahidə missiyasının həyata keçirilməsi, əks-təbliğat kampaniyasının aparılması çərçivəsində kütləvi aksiyaların keçirilməsi və digər bu kimi tədbirləri həyata keçirəcəyik. Kampaniya müddətində əhalini fəallaşdırmağa da çalışacağıq”. A. Hacılı əməkdaşlıqla bağlı hələlik digər müxalifət partiyaları ilə danışıqların aparılmadığını da qeyd edib: “Müsavat və “Azadlıq” bloku arasında əməkdaşlığa mane olan amillərdən biri məhz seçki ilə bağlı fərqli mövqe idi. Hətta Müsavatın iştirak edəcəyi halda belə, biz əməkdaşlığın mümkün olduğunu bildirsək də, blokda təmsil olunanlar bunun mümkünsüzlüyünü qeyd edirdilər. Artıq bu maneə aradan qalxıb və düşünürəm ki, səslənən çağırışlar arxasında real siyasi mövqe dayanırsa, əməkdaşlıq mümkündür”. A. Hacılı bəzi beynəlxalq təşkilatların müzakirələr aparmaq üçün artıq Müsavat Partiyasına müraciət etdiyini bildirib: “Bundan sonra beynəlxalq təşkilatlarla əlaqələrin necə qurulacağı ilə bağlı mövqe aydınlaşacaq”.
Azərbaycan Demokrat Partiyasının sədri Sərdar Cəlaloğlu isə ölkədə yeni situasiyanın yarandığını, buna görə də tələsik addım atmağın əleyhinə olduğunu qeyd edib. Onun sözlərinə görə, yeni situasiya bütün tərəflər tərəfindən dəyərləndirilməlidir: “Bəzən siyasi reallığın aydınlaşmasını gözləmədən addımlar atırıq ki, bu da çox vaxt ümumi işə xeyir vermir. Ona görə də prosesin tam durulmasını gözləmək lazımdır. Artıq müəyyən durulma var və bunu yenidən bulandırmağa ehtiyac yoxdur. Çünki bulanıq suda balıq tutmaq istəyənlər yenə də olacaq. Biz hələ ABŞ, ATƏT və Avropa Şurasının mövqeyini bilmirik. Bizim qərarların müəyyən dairələrə çatmadığı bir vaxtda atılacaq addımlar effekt verməyəcək”.
Seçkilərdə iştirak etmək qərarı vermiş Ümid Partiyasının sədri İqbal Ağazadə isə digər partiyaların qərarını təftiş etmək niyyətində deyil: “Bütün partiyalar qərar qəbul edərkən öz resurslarını, imkanlarını, demokratiyaya hansı xeyir verəcəklərini hesablayıblar. Həmin insanların cəmiyyət qarşısında xidmətləri və müəyyən qədər elektoratları var. Hesab edirlər ki, bu daha doğru addımdır. Düşünürəm ki, müxalifət bu istiqamətdə hansısa addımlar atıb birlik formalaşdıra bilər. Həmçinin, həmin partiyalar seçkini təkcə boykot etməməli, tərəfdarlarının seçkinin müşahidə edilməsində aktiv iştirakını təmin etməlidir”.

müxalifət_seçki