Daxili siyasət

Ana səhifə

Daxili siyasət

Azərbaycan siyasətində kim kiminlə müttəfiqlik etmək arzusundadır? - SORĞU

Azərbaycan siyasətində kim kiminlə müttəfiqlik etmək arzusundadır? - <font color=red>SORĞU</font>

28 noyabr 2008 12:35 (UTC +04:00)

Bakı. Elnur Məmmədli - APA. Müsavat Partiyası müxalifət düşərgəsində fəaliyyət göstərən partiyalardan yalnız Azərbaycan Xalq Cəbhəsi Partiyası (AXCP) ilə müttəfiq ola biləcəyini açıqlayıb. Partiyanın Məclis sədri Sülhəddin Əkbər APA-ya açıqlamasında Müsavatın müttəfiqlik kriteriyalarını artıq müəyyənləşdirdiyini, yalnız real müxalifət mövqeyində olan və real siyasi gücə malik partiyalarla müttəfiq olacaqlarını bildirib. S. Əkbər hazırda həm siyasi mövqeyinə, həm də real gücünə görə Müsavat Partiyasının məhz AXCP ilə müttəfiqlikdə maraqlı olduğunu bildirib. Digər partiyalar isə hələlik bu siyahıya düşə bilməyiblər. Bəs, Azərbaycanın siyasi səhnəsində fəaliyyət göstərən digər partiyalar kiminlə müttəfiqlik etmək arzusundadır?

Hakim Yeni Azərbaycan Partiyasının (YAP) icra katibinin müavini Mübariz Qurbanlı APA-ya bildirib ki, YAP yalnız İqtidaryönlü Partiyaların Məşvərət Məclisində təmsil olunan partiyaları özünün müttəfiqi hesab edir. M. Qurbanlı bu formatdan kənarda hər hansı partiya ilə müttəfiqlikdə maraqlı olmadıqlarını söyləyib: “Doğrudur, əməkdaşlıq etdiyimiz partiyalar var, ancaq bu əməkdaşlıq müttəfiqlik səviyyəsində deyil”.

Azərbaycan Demokrat Partiyasının (ADP) sədr müavini Həsrət Rüstəmov ideoloji və siyasi platforma baxımından ADP-nin Azərbaycanda liberal-demokratik dəyərlərə üstünlük verən yeganə partiya olduğunu deyib: “Bu baxımdan, müttəfiqimiz yoxdur. Eyni zamanda yeni siyasi kursumuzla bağlı da demək olar ki, təkik. Ümumilikdə isə sağ qüvvələr müttəfiqimiz hesab oluna bilərlər. Çünki ümumi demokratik prinsiplərin rəhbər tutulması, ölkədə demokratiyanın inkişaf etdirilməsi baxımından sağ təşkilatlarla müəyyən vaxtlarda müttəfiq olmuşuq, bu gün də bir yerdə ola bilərik. Bu sıraya Müsavat, AXCP, KXCP, ALP daxildir”.

Klassik Xalq Cəbhəsi Partiyasının (KXCP) sədri Mirmahmud Mirəlioğlu isə müttəfiq olmaq istədiyi partiyaların adını çəkməyib. O, millət və dövlət naminə çalışan, müsavatçılıq ideologiyasını daşıyan hər bir kəsi KXCP-nin müttəfiqi saydığını qeyd edib: “Ölkədə xeyli belə partiya var. Onların bəziləri sözdə, bəziləri isə əməldə bu prinsipləri qoruyur. Konkret öhdəlik və şərtlər olarsa, o zaman əməldə bu prinsipləri qoruyan partiyalarla müttəfiqlik edə bilərik”.

Hazırda AXCP və ALP ilə münasibətlərinin müttəfiqlik səviyyəsində olduğunu deyən Vətəndaş və İnkişaf Partiyasının (VİP) sədri Əli Əliyev “Azadlıq” bloku çərçivəsində 3 ildir, əməkdaşlıq etdiklərini xatırladıb: “Bu qurumlar bizim uzunmüddətli müttəfiqlərimizdir. Kifayət qədər normal və səmimi olan münasibətlərimiz davam edir”. Ə. Əliyev hələlik digər partiyalarla müttəfiqlik münasibətlərinin olmadığını qeyd edib.

Azərbaycan Milli İstiqlal Partiyasının (AMİP) baş katibi Fuad Muxtarov isə müttəfiqlik məsələsində problem olmadığını deyir. Onun sözlərinə görə, AMİP son vaxtlara kimi “beşlik” çərçivəsində bəzi partiyalarla əməkdaşlıq edib: “Mən inanıram ki, biz ADP, Müsavatla sərbəst, açıq fikir mübadiləsi nəticəsində müttəfiqlik əlaqəsində ola bilərik. Biz buna həmişə hazırıq”. F. Muxtarov AMİP-in Demokratiya Uğrunda İttifaqa daxil olmağa hazırlaşdığını və bu ittifaqda olan partiyaları müttəfiq hesab etdiklərini bildirib.

AXCP-nin sədr müavini Həsən Kərimov isə Müxalifətin Əməkdaşlıq Mərkəzində təmsil olunan partiyalarla müttəfiq olduqlarını qeyd edib: “Bu müttəfiqliyi gələcəkdə də davam etdirmək fikrindəyik. Başqa partiyaları isə müttəfiq kimi görmürük. Müəyyən mənada KXCP ilə hər hansı əməkdaşlıq mümkündür. Qalan partiyaların hakimiyyətə münasibəti bəlli olduğundan, onlarla əməkdaşlıqdan söhbət gedə bilməz”.

Azərbaycan Liberal Partiyasının (ALP) icraiyyə Komitəsinin sədri Elman Məmmədzadə isə təmsil etdiyi qurumun yalnız AXCP və VİP-lə müttəfiq olduğunu vurğulayıb: “Başqa partiyaları hələlik bu sırada görmürük. Biz öz imzamıza sadiqik. Ona görə də müttəfiqlik zamanı bütün şərtlərə əməl edirik”.

Ümid Partiyasının sədri İqbal Ağazadə deyib ki, demokratiya naminə, ümumi prinsiplər üçün bütün siyasi qüvvələrlə əməkdaşlığa hazırdırlar: “Müttəfiqlik məsələsi isə seçkilər zamanı ortaya çıxır və bu zaman da şərtlər danışılmalıdır. Yalnız bundan sonra hansı partiya ilə müttəfiq ola biləcəyimizi söyləyə bilərik. Bunun üçün elə bir mərhələ olmalıdır ki, tərəflərin arasında ümumi razılıq əldə edilsin. Biz hələlik heç kimlə belə danışıq aparmamışıq. Ona görə də kiminlə müttəfiq ola biləcəyimizi deyə bilmərəm”.

Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyev isə APA-ya rəhbərlik etdiyi partiyanın hazırda Vahid Azərbaycan Milli Birlik və Təkamül partiyaları ilə müttəfiq olduğunu bildirib. Bundan əlavə o, Demokratik Seçki Mərkəzində olan partiyalarla da əməkdaşlıq etdiklərini, bu qurumdakı partiyalarla gələcəkdə müttəfiq ola biləcəklərini mümkün sayıb: “Hətta Böyük Quruluş Partiyası ilə bu barədə müzakirəmiz də olmuşdu. Bəzi məsələlərdə mövqeyimiz üst-üstə düşməsə belə, biz bəzi partiyalarla müttəfiq ola bilərik”.