Daxili siyasət

Ana səhifə

Daxili siyasət

MTN Akademiyasının yaradılmasının 10 illik yubileyinə həsr olunmuş təntənəli mərasim keçirilib

06 dekabr 2008 09:41 (UTC +04:00)

Bakı-APA. Milli Təhlükəsizlik Nazirliyinin (MTN) Heydər Əliyev adına Akademiyasının yaradılmasının 10 illik yubileyinə həsr olunmuş təntənəli mərasim keçirilib. MTN-nin mətbuat xidmətindən APA-ya verilən məlumata görə, mərasimdən öncə nazirliyin və MTN Akademiyasının şəxsi heyəti Fəxri Xiyabanda Heydər Əliyevin və akademik Zərifə xanım Əliyevanın məzarını ziyarət ediblər.

Daha sonra yubiley mərasimi MTN Akademiyasında davam etdirilib. Təntənəli mərasimdə iştirak edən Prezidentin İcra Aparatının şöbə müdiri Fuad Ələsgərov, təhsil naziri Misir Mərdanov, Milli Məclisin deputatları və respublikanın ali təhsil ocaqlarının, o cümlədən hərbi tədris müəssisələrinin rektorları və rəisləri Akademiyanın “Şöhrət” muzeyində olublar. Qonaqlara Heydər Əliyevin fəaliyyətinə həsr edilmiş musiqili kompozisiya nümayiş etdirilib. Daha sonra milli təhlükəsizlik naziri general-leytenant Eldar Mahmudov tərəfindən Akademiyanın xidmətdə və tədrisdə fərqlənən bir qrup əməkdaşına fəxri fərman, medal, döş nişanları və digər mükafatlar təqdim olunub.

Akademiyanın iclas zalında davam edən tədbirdə çıxış edən milli təhlükəsizlik naziri general-leytenant Eldar Mahmudov iştirakçıları yubiley münasibətilə təbrik edib. O, 10 il ərzində akademiyanın maddi-texniki bazasının yaradılması, təlim və tədrisin təşkili sahəsində bir sıra işlər görüldüyünü bildirib. Nazir xüsusi təhsil ocağının fəaliyyətə başladığı ilk dövrlə müqayisədə bu gün vəziyyətin tamamilə dəyişdiyini vurğulayıb. O son illər burada böyük təmir və yenidənqurma işləri aparıldığını, təzə korpusların inşa edildiyini, akademiyanın maddi-texniki bazasının möhkəmləndirilməsi, ən müasir texnoloji vasitələrin tətbiqi istiqamətində işlər görüldüyünü bildirib. Akademiyada tədrisin xüsusi xidmət orqanlarına məxsus spesifiklik nəzərə alınmaqla qurulduğunu bildirən nazir, bu ali təhsil müəssisəsində xüsusi bilikləri mənimsəyən gənclərin əsl peşəkarlar kimi yetişməsi ilə yanaşı, onların Vətənə və xalqa sədaqət ruhunda tərbiyəsinə, dünyagörüşlərinin inkişafına xüsusi diqqət yetirildiyini bildirib. General-leytenant Eldar Mahmudov bildirib ki, milli təhlükəsizlik orqanlarının müasir tələblərə və çağırışlara uyğun təkmilləşməsi, yeniləşməsi istiqamətində həyata keçirilən tədbirlər bundan sonra da uğurla davam etdiriləcək, müstəqil Azərbaycan dövlətinin təhlükəsizliyini təmin edəcək kadrların hazırlanması işinə müstəsna önəm veriləcək.

Mərasimdə çıxış edən təhsil naziri Misir Mərdanov, Yeni Azərbaycan Partiyasının icra katibi, Milli Məclisin deputatı Əli Əhmədov, Azərbaycan Respublikasının Prezidenti yanında Dövlət İdarəçilik Akademiyasının rektoru, professor Seyfəddin Qəndilov akademiyanın şəxsi heyətini yubiley münasibətilə təbrik ediblər. Tədbirdə akademiyanın rəisi, general-leytenant Ziya Yusifzadə təhsil ocağında müasir standartlar səviyyəsində aparılan təhsil-tədris, təlim-tərbiyə, eləcə də kursantların mənəvi yetkinliyi və fiziki sağlamlığı istiqamətində görülən işlər barədə də geniş məruzə edib. Tədbirin sonunda MTN-nin Heydər Əliyev adına Akademiyasının şəxsi heyəti adından prezident İlham Əliyevə müraciəti qəbul olunub. Sonda Akademiyanın 10 illik yubileyi münasibətilə hazırlanmış “Şücaət və şöhrətin ünvanı” adlı sənədli film nümayiş olunub.