Daxili siyasət

Ana səhifə

Daxili siyasət

BAXCP sədri: “PKK ilə əməkdaşlıq etməklə Ermənistanla əməkdaşlıq etmək arasında heç bir fərq yoxdur”- AÇIQLAMA

BAXCP sədri: “PKK ilə əməkdaşlıq etməklə Ermənistanla əməkdaşlıq etmək arasında heç bir fərq yoxdur”-<font color=red> AÇIQLAMA</font>

16 avqust 2011 14:31 (UTC +04:00)

Bakı-APA. “Azərbaycan gücləndikcə, iqtisadi gücü artdıqca bu, İranı narahat edəcək. Təəssüf ki, İran güclənməkdə olan Azərbaycanla daha yaxşı qonşuluq münasibətləri qurmaq əvəzinə başqa vasitələrə əl atır. Bu gün Cənubi Azərbaycan İranın tərkibindədir və orada 35 milyon azərbaycanlı yaşayır ki, bu da əslində rəsmi Tehranın Bakı ilə daha yaxşı münasibətlər qurmasını əsaslandıran amil kimi qəbul olunmalıdır. Amma bunun qarşılığında biz hər zaman Azərbaycanın daxili işlərinə müdaxiləni görürük. Azərbaycanın bəzi vətəndaşlarının ələ alınaraq, ölkənin konistitusion quruluşuna qarşı çıxmasına təhrik etmə halları ilə qarşılaşırıq. Əlbəttə bu da haqlı olaraq Azərbaycan ictimaiyyətində narazılıq doğurur”. APA-nın məlumatına görə, bunu Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev deyib.
Q. Həsənquliyev bildirib ki, İranın Azərbaycan torpaqlarını işğal edən Ermənistanla iqtisadi, siyasi, hətta hərbi əməkdaşlığını gündən-günə gücləndirməsi Azərbaycan xalqını narahat edir: “İran Ermənistanın iqtisadi baxımdan ayaq üstə durmasına yardım edir. Bütün bu məsələlərin təməlində dayanan əsas amil isə İranın Azərbaycanın müstəqilliyi ilə barışmamasıdır. İran orada yaşayan azərbaycanlıların nə vaxtsa oyana biləcəklərindən narahatdır. Fars-molla rejiminin niyyəti Azərbaycanın daxili və xarici siyasətinə müdaxilə etmək, faktik olaraq onu öz maraqlarına uyğun yönəltmək, burada müstəqil siyasət yürüdə bilməyən, marionet bir hökumət görməkdir. Lakin Azərbaycan xalqı dini ideologiya ilə yüklənmiş bir hakimiyyətin, xüsusilə də islam fundamentalizmini özündə ehtiva edən bir rejimin əsil mahiyyətini yaxşı görür və belə çağırışlara qarşı özünün sərt təpkisini göstərir”.
BAXCP sədri Azərbaycanda bir qrup siyasətçi və media nümayəndəsini İranın tezislərinə dəstək verməkdə də ittiham edib: “Azərbaycanda bir antitezisçilər qrupu formalaşıb. Bu insanlar, nə deyirsənsə mütləq onun əleyhinə çıxırlar. Guya özlərinin fərqli münasibətlərini ortaya qoyurlar. Bu psixoloji bir xəstəlikdir ki, ona düçar olmuş insanlar Azərbaycanda da var. Bir qrup insan isə başqa bir xəstəlikdən əziyyət çəkir - içərilərində qərəz var. Məsələn, ermənilər Azərbaycan prezidentinin əleyhinə danışanda da onlar sevinirlər. Xatırlayırsınızsa, Sarkisyanın Azərbaycan prezidenti ilə bağlı açıqlamalarına bu qrupun təmsilçiləri necə reaksiya verdilər, canfəşanlıqla onu necə təqdim etdilər. Yaxud bu yaxınlarda İran generalının rəsmi Bakının ünvanına söylədiyi ittihamdardan necə fərəhləndilər. Təki söylənilənlər Azərbaycan dövlətinin və hökumətinin əleyhinə olsun. Çox təəssüf ki, bu insanlar özlərini siyasi ehtiraslarına təslim ediblər”.
Q. Həsənquluyev ağır dövləti cinayətdə ittiham olunan Ayaz Mütəllibovla bağlı bir qrup müxalifətçinin apardığı kampaniyanı da başa düşmədiyini deyib: “ Mənim Ayaz Mütəllibovla hər hansı bir münasibətim olmayıb. Amma ona ağır itki üz verdi, gənc oğlu dünyasını dəyişdi. Allah rəhmət eləsin. Hesab edirəm ki, Ayaz Mütəllibovun vətənə qayıtması üçün Azərbaycan prezidenti tərfəfindən kişiyana qərar qəbul olunub. Hər kəs kimi mən də bu addımı alqışlayıram və hesab edirəm ki, belə bir imkan ona yarıdılmalıydı. Amma düşünürəm ki, illərin keçməsindən asılı olmayaraq öz ölkəsinə, xalqına qarşı bu və ya digər dövləti cinayətlər törətmiş şəxslər yalnız müvafiq məhkəmə qərarlarından sonra əfv edilə bilərlər. Bizim cinayət qanunvericliyimiz bunu tələb edir. Bir qrup insan, hansılar ki, Ayaz Mütəllibovun tərəfdalarıdırlar, onlar onun Bakıda yenidən cinayət məsuliyyətinə cəlb olunmamasını istəyirlər. Hesab edirəm ki, belə addım çox ciddi nəticələrə gətirib çıxara biləcək presidentə yol aça bilər. Belə bir hal olarsa, bəzi siyasətçilər dövləti cinayətlər törətməkdən çəkinməzlər. Düşünərlər ki, ən pis halda ölkəni tərk edəcək və 20 ildən, hər şey unudulduqdan sonra vətənə qayıdacaqlar. Belə olmamalıdır. Cinayət Məcəlləsinin 74 və 75-ci maddələrində cinayət məsuliyyətindən azadolma halları var. Orada da ağır və xüsusilə ağır cinayətlər törətmiş şəxslərin şəraitin dəyişməsilə cinayət məsuliyyətindən azad olunması nəzərdə tutulmur. Mütəllibov həm bu baxımdan, həm də axtarışda olduğuna görə cinayət məsuliyyətindən azad oluna bilməz. Azərbaycana qayıdış vaxtı bitəndən sonra o, istintaq orqanlarına gedib istintaqın suallarını cavablandıra bilər. Bundan sonra istintaq yekunlaşdırılıb materiallar məhkəməyə göndərilər. Məhkəmə onun haqqında hansı qərarı qəbul edərsə bu məhkəmənin işidir. Amma mən hesab edirəm ki, adətən Mütəllibov kimi insanlar, hətta ömürlərinin sonuna çox az bir müddət qalmalarına baxmayaraq, halbuki Mütəllibov kifayət qədər gümrah görünür, ədalət məhkəməsi qarşısında dayanmalıdırlar. Bu gün onun siyasi motivlərlə həbs olunduğunu deyən və onun azadlığını tələb edən şəxslər vaxtilə Mütəllibovun üzərinə zirehli texnika ilə gedirdi. 1992-ci ilin mayın 15-ni xatırlamaq kifayətdir. Ondan sonra da AXC hakimyyəti Mütəllibov haqqında cinayət işi qaldırdı. Bu gün bir qrup insanın özlərini belə aparması onu göstərir ki, guya Mütəllibovun Azərbaycandan Moskvaya qaçmasında AXC hakimiyyətinin rolu olmayıb. Onun siyasi motivlərlə həbs olunmasını gündəmə gətirən insanlar siyasi riyakarlığın ən bariz nümunəsini göstərirlər. Belə insanlar elə zənn edirlər ki, qısa müddət ərzində hər şey unudulur, tarix yaddan çıxır”.
İndi A. Mütəllibovun açıqlamasını tənqid edən müxalifətçilərin bir neçə gün əvvəl onun cinayət məsuliyyətindən azad edilməli olduğunu, AXCP sədri Əli Kərimlinin mətbuata Mütəllibovla koalisiya qurmağın mümkünlüyü barədə təklifini xatırladan Q. Həsənquliyev “bu məsələdə yenə də həmin adamlar yanıldılar. Ölkədən qovuduqları bir adamın timsalında özlərinə müttəfiq axtarmaqla özlərini biabır etdilər” deyib.

Son günlər dünyanın diqqətində olan PKK məsələsinə münasibət bildirən Q. Həsənquliyev bu terror təşkilatına münasibətlə bağlı Azərbaycan prezidentinin son açıqlamasını xatırladıb: “ Bir qrup adam üçün isə əsas məqsədi dövlətin maraqlarından çıxış etmək deyil. Azərbaycanda heç bir fakta söykənmədən PKK izi axtaran adamlar əvvəlcə ortada olan Türkiyə Ermənistan iqtisadi münasibətlərinə diqqət yetirməlidirlər. Bu adamların Türkiyənin Ermənistanla olan və gündən-günə genişlənən iqtisadi-ticari əlaqələrilə bağlı susmalarının yeganə bir səbəbi var: Fikirləşirlər ki, susmaqlarının, PKK məsələsini qabartmalarının, Türkiyə-Ermənistan iqtisadi əməkdaşlığını arxa plana keçirmələrinin müqabilində Türkiyənin siyasi dairələrinin dəstəyini qazanacaqlar. Məqsəd yenə də sırf daxili siyasətə hesablanmış cılız hisslər və cılız yanaşmalardır. Türkiyənin Ermənistanla bütün sahələrdəki əlaqələri ortadadır. Bu barədə bir kəlmə də olsun deyilmir. Amma olmayan PKK-Azərbaycan əlaqələrindən, PKK-ya hansısa Azərbaycan iş adamının maliyyə yardımı etməsindən genişinə-boluna danışır və yazırlar. Bəsit və reallığa uyğun gəlməyən yanaşma nümayiş etdirirlər. Türkiyənin naziri deyir ki, bizim Ermənistanla ticari əlaqələrimiz 250 milyon dolları keçib. Baxın, PKK-nın Türkiyəyə qarşı etdiyi cinayətlərdən daha ağırını Ermənistan Azərbaycana qarşı edib və etməkdədir. Əgər Azərbaycanda insanlar PKK ilə əməkdaşlıq etsələr, Türkiyə bunu necə qarşılayar? Azərbaycandan kimsə PKK ilə əməkdaşlıq edərsə o, bütün türk xalqının düşməni elan olunmalıdır! PKK ilə əməkdaşlıq etməklə Ermənistanla əməkdaşlıq etmək arasında heç bir fərq yoxdu. Amma bundan danışıb, öz dərdlərimizdən danışmamaq milli qeyrətsizlikdir. Görünür onlar üçün bu kimi məsələlərdə sərhəd yoxdur. Onlar özünə hörmət edən siyasət adamlarının toxunulmaz saydığı sərhədləri çoxdan keçiblər. Ermənilərlə saziş də bağlaya, ermənilərin və farsların verdikləri bəyanatlara sevinə də bilərlər... Bu da ciddi mənəvi aşınmanın göstəricisidir”.