Daxili siyasət

Daxili siyasət

Talışların adından istifadə edən bir qrup şəxsin Azərbaycanın Rusiyadakı səfirliyi önündə keçirmək istədiyi aksiya təşkilatçıların gəlməməsi səbəbindən baş tutmayıb

15 mart 2007 16:52 (UTC +04:00)

Bu barədə APA-ya Azərbaycan səfirliyinin müşaviri Baxış Zeynalov məlumat verib. Aksiyanın baş tutmamasına səbəb tədbirin təşkilatçılarının piketə qatılmamasıdır. Baxış Zeynalov bu gün saat 17.00 radələrində səfirlik önünə 5-10 nəfərin toplaşdığını deyib: “Aksiyanın təhlükəsizliyini təmin edən milis nəfərləri aksiya keçirmək üçün Moskva şəhər rəhbərliyinə ünvanlanmış müraciətin müəllifinin orada olmamasını əsas gətirərək səfirlik önünə toplaşanlardan ərazini tərk etməyi tələb edib. Səfirlik qarşısına gələn 5-10 nəfər də sakitcə dağılışıblar”. Qeyd edək ki, “Talış” Regional Milli-Mədəni Muxtariyyət təşkilatı və Talış Mədəniyyətinin İntibahı Beynəlxalq Fondu Rusiya paytaxtında fəaliyyət göstərən kütləvi informasiya vasitələrinə Azərbaycan səfirliyi qarşısında aksiya keçiriləcəyi barədə press-reliz göndərib. Press-relizdə Moskva şəhər rəhbərliyi tərəfindən sanksiyalaşdırılmış bu aksiyanın guya Azərbaycanda talış xalqının diskriminasiyaya uğramasına etiraz əlaməti olaraq keçiriləcəyi qeyd olunub. Lakin təşkilatçılar aksiyaya qatılmadıqları üçün tədbir baş tutmayıb. /APA/