Daxili siyasət

Ana səhifə

Daxili siyasət

İosif Şaqal: “Azərbaycan səfirinin İsrail prezidentinə öz etimadnaməsini təqdim etməsi ilə bağlı keçiriləcək mərasimdə iştirak etməyi çox arzulayıram”

08 iyun 2007 09:28 (UTC +04:00)

- İsrail-Azərbaycan Beynəlxalq Assosiasiyasının (AzİZ) fəaliyyəti barədə nə deyə bilərsiniz?
- Mən hesab edirəm ki, assosiasiya fəaliyyət göstərdiyi iki ay müddətində çox iş görə bilib. Bizim çoxlu perspektiv planlarımız var. Mən çox ümid edirəm ki, deputat səlahiyyətlərim başa çatana qədər İsraildə Azərbaycanın səfirliyi açılacaq. Bu, mənim arzumdur. Mən Azərbaycan səfirinin İsrail prezidentinə öz etimadnaməsini təqdim etməsi ilə bağlı keçiriləcək mərasimdə iştirak etməyi çox arzulayıram.
- Bu yaxınlarda ABŞ-da səfərdə olmusunuz. Bu səfər və orada yəhudi lobbisinin liderləri ilə keçirdiyiniz görüşlər haqqında məlumat verməyinizi istərdik.
- Biz Azərbaycanın diaspora üzrə dövlət komitəsi ilə sıx əməkdaşlıq şəraitində işləyirik və fəaliyyətimizi koordinasiya edirik. Komitənin sədri Nazim İbrahimov İsrailə səfəri zamanı XİN-də olarkən ABŞ-dakı yəhudi diasporasının Azərbaycan əleyhinə 907-ci düzəlişin ləğvi məsələsində
hansı rol oynaya biləcəyi məsələsi müzakirə olundu. Görüşdə XİN-in baş direktorunun müavini Mark Sofer də iştirak edirdi və mən ona Azərbaycanın İsrailə münasibətdə dostluq və tolerantlıq nümayiş etdirdiyini söylədim. Dedim ki, İsrail-Azərbaycan Beynəlxalq Assosiasiyasının yaradılması bu ölkənin bizə nə qədər pozitiv yanaşdığını və maraqlarımızın nə qədər üst-üstə düşdüyünü göstərir. Görüşdə qərara alındı ki, cənab İbrahimov ABŞ-ın daxili və xarici siyasətinə ciddi təsir göstərən yəhudi təşkilatlarının liderləri ilə bir araya gəlməlidir. Bundan bir ay sonra Nyu-Yorkda ABŞ-dakı yəhudi lobbisinin liderləri ilə görüşdük. Azərbaycanı Nazim İbrahimov və BMT-dəki daimi nümayəndə Aqşin Mehdiyev, İsraili isə Azərbaycandakı səfir Artur Lenk təmsil edirdi. Çox xoş və konstruktiv söhbət oldu və mən hesab edirəm ki, biz irəliləməyə davam edəcəyik.
- Azərbaycanla Ermənistan arasındakı münaqişə ilə bağlı İsrailin rəsmi mövqeyi necədir?
- İsrail münaqişənin sülh yolu ilə həllini istəyir. Biz problemin sülh yolu ilə həllinə yönəlmiş beynəlxalq səyləri dəstəkləyirik və istənilən köməyi göstərməyə hazırıq. Rəsmi mövqeyə gəldiksə isə, demək lazımdır ki, həm İsrail, həm də Azərbaycan faktiki olaraq eyni şəraitdədir. Biz Azərbaycana ikinci Livan müharibəsi zamanı niyə Livanı dəstəklədiyinə dair sual vermirik. Ancaq bu, iki ölkə arasında gərginliyə və etirazlara səbəb olmadı. Azərbaycan heç vaxt İsrail-Fələstin qarşıdurması ilə bağlı mövqeyini açıqlamayıb. Mövqenin olmaması və ya bildirilməməsi elə mövqe deməkdir. Ona görə də mən istərdim ki, azərbaycanlı dostlarım və həmkarlarım bizim də təxminən eyni vəziyyətdə olduğumuzu anlasınlar. Bizim müharibəyə, Azərbaycan ərazilərinin işğalına münasibətimiz sual doğurmur. Mən Azərbaycan və Ermənistan prezidentlərinin Sankt-Peterburq görüşünü diqqətlə izləyəcəyəm. Tərəflərdən hansınınsa qan tökülməsini arzuladığını düşünmürəm. Hamımız sülh istəyirik. Biz İsraildə yaşayaraq problemlərimizi böyük qanlar hesabına həll edirik və bunun nə qədər pis olduğunu bilirik. Biz sülh şəraitində yaşamaq istəyirik və Azərbaycan anaları kimi, biz də övladlarımızın ölməsini istəmirik. /APA/