Daxili siyasət

Daxili siyasət

Los-Ancelesin polis rəisi: “Davamlı artan əlaqələrimiz sayəsində Azərbaycan ABŞ üçün vacib müttəfiq olaraq qalacaq”

14 sentyabr 2007 09:55 (UTC +04:00)

- Cənab Baka, iyunda rəhbərlik etdiyiniz qurumla Azərbaycan hüquq-mühafizə orqanlarının əməkdaşlığını müzakirə etmək üçün Bakıya səfər etmişdiniz. Sizin ofisiniz Amerikada ən çox texnoloji yenilikləri tətbiq edən təşkilatdır, Azərbaycanla bu sahədə təcrübə mübadiləsi aparmaq mümkündürmü?
- Mən Bakıda olarkən fövqəladə hallar naziri Kəmaləddin Heydərovla görüşdüm. Onunla bizdə uğurla tətbiq edilən “kəsilməyən kommunikasiya sistemi” barədə söhbət etdim. Bu sistem polis, yanğın söndürmə və təcili yardım xidmətlərinin daimi əlaqəsini nəzərdə tutan şəbəkədir. Nazirliyin də eyni şəbəkəni Azərbaycanda tətbiq etmək planları var. Azərbaycanla əməkdaşlığımızın digər istiqaməti Azərbaycan daxili işlər orqanları əməkdaşlarının Los-Ancelesdə təcrübə keçməsi ola bilərdi. Onlar canlı şəraitdə şəhər polisinin iş fəaliyyəti ilə tanış olardılar. Sizin polisi şəhərimizdə qonaq qismində görmək istərdim.
- Bakıda olarkən prezident İlham Əliyev, xarici işlər naziri Elmar Məmmədyarov və digər rəsmi şəxslərlə görüşləriniz oldu. Özünüz üçün həmin görüşlərdən nə müəyyən etdiniz?
- Mən bilirəm ki, prezident İlham Əliyevin yalnız Azərbaycanla yox, GUAM-la bağlı da böyük planları var. Hesab edirəm ki, regionun inkişafı üçün Azərbaycan, Gürcüstan, Moldova və Ukrayna xeyli işlər görürlər. Bu, ABŞ üçün də çox vacibdir. Lakin mənə tam aydın oldu ki, prezident İlham Əliyev regionun şərtsiz lideri və ən nüfuzlu şəxsidir. Onun regionun inkişafı ilə bağlı proqnozlarına heyran qaldım. Azərbaycan iqtisadiyyatının inkişaf perspektivləri genişdir və biz bunu müşahidə edirik. Yaxın illərdə büdcəniz 8-10 milyard dollara yaxın olacaq. Ona görə indi düz istiqamətdə inkişaf etmək çox vacibdir və prezidentin bu məsələ ilə bağlı konkret planları mövcuddur. İqtisadi inkişaf naziri Heydər Babayev, xarici işlər naziri Elmar Məmmədyarov və digər hökumət üzvləri Azərbaycanda iqtisadi inkişafın təmin olunması üçün birgə işləyirlər.
- Sizcə Bakını digər region şəhərlərdən fərqləndirən cəhət nədir?
- Mən bilirəm ki, Bakı çox gözəl və vacib şəhərdir. Onun turizm və tarix baxımından gözəl potensialı var. Ölkənin insanları və prezidenti çox səmimidirlər. Azərbaycanın iqtisadi artımı da məni heyran etdi. Adı vətəndaşlarınızla yanaşı, qısa müddət ərzində görüşdüyüm bütün nazirlərə öz minnətdarlığımı çatdırıram. Odlar diyarının bəzi tarixi guşələrini də görməyə vaxt tapdım. İnanıram ki, davamlı artan əlaqələrimiz sayəsində Azərbaycan ABŞ üçün vacib müttəfiq olaraq qalacaq.
- Azərbaycanın Los-Ancelesdə baş konsulluğu ilə faydalı əməkdaşlıq qura bilibsinizmi?
- Baş konsul Elin Süleymanov Azərbaycanın Los-Anceles şəhərindəki ilk konsuludur və işinin öhdəsindən yaxşı gəlir. İstəyirəm ki, onu Azərbaycanda biznes qurmaq niyyətində olan şəhər biznesmenləri ilə yaxından tanış edim. Los-Anceles şəhərinin seçilmiş rəsmisi olaraq baş konsulu mümkün qədər çox adama təqdim edəcəyəm ki, Azərbaycanı tanısınlar. /APA/