Daxili siyasət

Daxili siyasət

İsgəndər Həmidov: “Cib müxalifəti müxalifət düşərgəsinin bir araya gəlməsinə imkan vermir”

25 sentyabr 2007 12:45 (UTC +04:00)

“Azərbaycanda cib müxalifəti var və onlar müxalifət düşərgəsinin bir araya gəlməsinə imkan vermirlər. Müxalifət liderlərinin içərisində olan mənəm-mənəmlik birliyin baş tutmasını əngəlləyir”. APA-nın məlumatına görə, bu fikirləri Azərbaycan Milli Demokrat Partiyasaının (AMDP) sədri İsgəndər Həmidov bildirib. Müxalifətin birliyinə nail ola bilmədiklərini deyən İ. Həmidov bunun reallaşması üçün sonuncu cəhdin qaldığını güman edir: “Hələ bütün körpülər yanmayıb. Bu yaxınlarda Demokratiya Uğrunda İttifaq seçki qanunvericiliyinə dəyişiklik edilməsi ilə bağlı bütün partiyalarla birgə müzakirələr aparmaq niyyətindədir. Bu danışıqlar sırf Seçki Məcəlləsi ilə bağlı olacaq”.
Bu gün Azərbaycanda müxalifətin çox zəif olduğunu deyən İ. Həmidov bəzi insanların aldıqları qrant xətrinə mühüm məsələlərdə susduqlarını bildirib: “Amma müxalifət seçki qanunvericiliyinin dəyişdirilməsi ilə bağlı ümumi fikrə gələ bilər. Vahid namizəd haqqında danışmaq isə tezdir. Həmçinin bu məsələ qeyri-ciddi və qeyri-real məsələdir. Müxalifət yalnız ümummilli məsələlərdə bir araya gələ bilər. Bir şərtlə ki, pul ideyanı qabaqlamaya”. İ. Həmidov təmsil olunduğu DUİ-da növbəti prezident seçkiləri ilə bağlı müzakirələrin aparılacağını bildirib. Hələlik seçkilərdə iştirakla bağlı konkret qərarın olmadığını deyən partiya sədri müxalifətin birgə qərar qəbul etməsini vacib sayır: “Biz seçki qanunvericiliyinin dəyişdiriləcəyinə ümid edirik. Seçkidə iştirak məsələsində Seçki Məcəlləsinin dəyişdirilməsini əsas götürürəm. Kollegial şəkildə hansı qərar çıxarılsa, o qərara tabe olacağıq”. /APA/