Daxili siyasət

Ana səhifə

Daxili siyasət

Arif Hacılı: “ADP hakimiyyətin siyasi xəttini dəstəkləyən mövqe tutsa, Müsavat bu partiya ilə münasibətlərinə yenidən baxacaq”

05 oktyabr 2007 12:12 (UTC +04:00)

“Azərbaycan Demokrat Partiyası hakimiyyətlə əməkdaşlığını ciddiləşdirib iqtidarın siyasi xəttini dəstəkləyən mövqe tutsa, Müsavat rəhbərliyi bu partiya ilə münasibətlərinə yenidən baxacaq”. Bunu APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı deyib. O bildirib ki, hazırda Müsavatın ADP ilə əməkdaşlığı müzakirələrdən uzağa getmir, eyni zamanda ADP-nin də Müsavat qarşısında hər hansı öhdəliyi yoxdur və bu partiya öz siyasətini müəyyənləşdirmək hüququna malikdir: “Bu partiyalar arasında qarşılıqlı öhdəlik yoxdur və mən ADP-nin daxili işlərinə qarışmaq istəmirəm. Amma onu qeyd edə bilərəm ki, ADP-nin hazırkı mövqeyinin nə Azərbaycana, nə də bu partiyanın özünə xeyir gətirəcəyini düşünmürəm”.
ADP ilə əməkdaşlıq edən Azərbaycan Milli İstiqlal Partiyasının (AMİP) sədri Ayaz Rüstəmov da ADP-nin daxili işinə qarışmaq istəmədiklərini vurğulayıb. ADP ilə yalnız seçkilərin demokratik keçirilməsi və seçkiyə nəzarətlə bağlı əməkdaşlıq etdiklərini söyləyən partiya sədri birgə məsləhətləşmə aparan partiyaların bir-birinin fəaliyyətini çərçivəyə almamaqla bağlı razılıq əldə etdiyini xatırladıb: “Kimin namizədliyini müdafiə etmək onların öz işidir. Amma hesab edirəm ki, fikirlər düşünülmüş şəkildə bildirilməlidir”. A. Rüstəmov mövcud məsləhət formatının seçki kampaniyasına start verilənə kimi mövcud olacağını düşündüyünü də əlavə edib. /APA/