Daxili siyasət

Ana səhifə

Daxili siyasət

Səməd Seyidov: “Avropa Şurasının missiyası Dağlıq Qarabağa Azərbaycanın nəzarətində olan ərazidən səfər etməlidir”

05 oktyabr 2007 14:50 (UTC +04:00)

Bunu APA-nın Avropa bürosuna müsahibəsində Azərbaycanın AŞ PA-dakı nümayəndə heyətinin sədri Səməd Seyidov qurumun payız sessiyasının nəticələrinə münasibət bildirərkən deyib. Onun sözlərinə görə, bu sessiyada Milli Məclisin sədri Oqtay Əsədovun Avropa Şurasına səfəri, görüşləri və apardığı müzakirələr də mühüm əhəmiyyət kəsb edib: “ Bu da Avropa Şurası ilə Azərbaycan arasında münasibətlərin yüksək səviyyədə olduğunu göstərir”.
Azərbaycanın öhdəliklərinin yerinə yetirilməsi ilə bağlı Monitorinq Komitəsində müzakirə aparıldığını və medianın hazırkı vəziyyəti, insan haqları, Seçki Məcəlləsi və “Sərbəst toplaşmaq azadlığı” haqında qanunla bağlı qeydlərin və narahatlıqların ifadə edildiyini deyən S. Seyidov bu məsələlər münasibət bildirdiklərini, hər şeyin qanun çərçivəsində həll olunduğunu vurğuladıqlarını da söyləyib: “ Seçki Məcəlləsi ilə bağlı Venesiya Komissiyası ilə ciddi müzakirələr aparılır. Azərbaycan söz azadlığı və media məsələlərinə xüsusi önəm verir, bununla bağlı problemlərin tezliklə həll olunmasının tərəfdarıdır. Amma təbii ki, hər şey qanun çərçivəsində olmalıdır. Bu müzakirələrdən sonra isə yeni məruzəçinin təyin olunması ilə bağlı razılığa gəlindi. Yalnız yeni məruzəçi təyin olunandan sonra onların bu ilin sonu və ya gələn ilin əvvəli Azərbaycana səfərləri olacaq”. Yeni məruzəçinin kimliyini təxminən bildiklərini deyən S. Seyidov rəsmi təsdiq olmadan ad açıqlamaq istəməyib.
Sessiya çərçivəsində Dağlıq Qarabağ üzrə alt komitənin iclasının keçirildiyini söyləyən nümayəndə heyətinin rəhbəri komitənin sədri Lord Rassel Constonla görüşündə onun hər iki ölkəyə səfər etmək niyyətində olduğunu və Azərbaycanın bu səfəri alqışladığını deyib: “Biz komitənin Dağlıq Qarabağa səfərinin də əleyhinə deyilik. Sadəcə, bütün addımların Azərbaycanın ərazi bütövlüyü çərçivəsində atılmasının tərəfdarıyıq. Bu isə o deməkdir ki, Dağlıq Qarabağa Azərbaycanın nəzarətində olan ərazidən səfər edilməlidir. Bu, tam məntiqlidir. Məsələn, Avropa Şurası Gürcüstana öz məruzəçisini göndərir. Məruzəçi təbii Gürcüstana gedendə Cənubi Osetiyaya da, Abxaziya da getməlidir. Məgər o Gürcüstana gedəndən sonra yenidən Rusiyaya keçib, sonra Abxaziyaya və ya Cənubi Osetiyaya gedir? Və ya Moldovaya gedən məruzəçi Dnestrayıya getmək üçün yenidən Rusiyaya keçir? Avropa Şurasının məruzəçisi hər hansı ölkəyə gedəndə ora ərazi bütövlüyü nöqteyi-nəzərindən yanaşır. Mən başa düşə bilmirəm, Azərbaycanın ərazi bütövlüyü bütün ölkələr tərəfindən tanındığı halda, niyə Dağlıq Qarabağa Ermənistandan gedilməlidir? Biz öz nəzarətimiz altında olan ərazilərlə bağlı tam qarantiya veririk, heç bir problem yoxdur. Əgər kim buna əməl etməyib, Dağlıq Qarabağa Ermənistandan gedəcəksə, Azərbaycanın ərazi bütövlüyünə hörmətsizlik etmiş olacaq. Bu hörmətsizliyi edən şəxs və ya şəxslər isə Azərbaycanla hər hansı əməkdaşlıq edə bilməz. Bu məsələ ilə bağlı Ermənistan tərəfi iddialar irəli sürmək niyyətində oldu, amma onlar heç nə edə bilməzlər. Məsələ biz istədiyimiz formada həllini tapacaq. Çünki Azərbaycanın tələbi beynəlxalq hüquqa uyğundur, ona görə istər-istəməz buna əməl olunacaq”.
S. Seyidov mədəni irsin qorunması ilə bağlı cənab O’haranın rəhbərlik etdiyi heyətin regiona səfərinə də baxılmasının və təhlil olunmasının vacibliyini qeyd edib: “Biz və mən şəxsən bir neçə dəfə məktub göndərib, O”haranın səfərinin tərəfdarı olduğumuzu, səfərə heç bir əngəl yaratmaq fikrində olmadığımız bildirmişik. Amma bu səfər də beynəlxalq normalara uyğun həyata keçirilməlidir. Çünki ortada ərazi bütövlüyü məsələsi var və bu, müzakirə mövzusu deyil. Bu səfər də qeyri-müəyyən vaxta qədər təxirə salındı, yəqin ki, reallaşacaqsa, beynəlxalq qanun çərçivəsində Azərbaycanın təklif etdiyi marşrutla olacaq, bizim israrlı olduğumuz mövqe dəstəklənəcək”.
S. Seyidov sessiya çərçivəsində nümayəndə heyəti üzvlərinin çıxışlarının, görüşlərin Azərbaycan həqiqətlərinin çatdırılmasına böyük rol oynadığını deyib. /APA/