Daxili siyasət

Ana səhifə

Daxili siyasət

Müxalifət proporsional seçki sisteminin bərpasını istəyir

09 oktyabr 2007 10:37 (UTC +04:00)

“Proporsional seçki sisteminin bərpa edilməməsi Azərbaycanda siyasi partiyaların zəifləməsinə və siyasi proseslərə təsir imkanını itirməsinə səbəb ola bilər”. Bunu APA-ya açıqlamasında Müsavat Partiyası Məclisinin sədri Sülhəddin Əkbər deyib. O bildirib ki, Müsavat Partiyası vaxtilə bu sistemin ləğvini müxalifətin 2000-ci ildə keçirilən parlament seçkilərində qazandığı nəticələrlə əlaqələndirib: “Bunun uzaq gələcəyə hesablanmış səbəbi isə partiyaların sıradan çıxarılması, çoxpartiyalılığın ləğvidir. Son vaxtlar YAP-dan olan bir sıra şəxslərin bu sistemin bərpası ilə bağlı çıxışları onu göstərir ki, YAP təmsilçiləri məsələnin mahiyyətini anlayıblar. Çünki YAP partiya olaraq hakimiyyətin formalaşmasında, qərarların qəbulunda, kadr təyinatlarında iştirak etmir. Yəni siyasi partiya olaraq YAP da zəifləməkdə, təsirini itirməkdədir”. S. Əkbər proporsional sistemin bərpası üçün istənilən siyasi partiya ilə əməkdaşlığa hazır olduqlarını açıqlayıb.
AXCP Ali Məclisinin sədri Qulamhüseyn Əlibəyli də proporsional seçki sisteminin ləğvinin siyasi partiyaların inkişafına mənfi təsir etdiyini söyləyib. Proporsional sistemin bərpasını vacib sayan Q. Əlibəyli dəfələrlə bu yöndə təklif irəli sürdüklərini qeyd edib: “Amma proporsional sistemin bərpası üçün referendum keçirilməlidir ki, bu da dövlət başçısının səlahiyyətindədir. Bu tələblə kütləvi aksiyalar keçirmək olar. Amma biz sivil yolla məsələnin həllini istəyirik”.
Yeni Azərbaycan Partiyası (YAP) Siyasi Şurasının üzvü, millət vəkili Aydın Mirzəzadə isə ümumiyyətlə, bu məsələyə qayıtmağa ehtiyac görmür. Onun sözlərinə görə, 2002-ci ildə keçirilən referendumda əhalinin böyük hissəsinin səsi ilə proporsional seçki sistemi ləğv olunub və majoritar seçki sistemi saxlanılıb. A. Mirzəzadə majoritar sistemin hər bir namizədi seçiciyə yaxınlaşdırdığını, proporsional sistemlə seçilən deputatın isə hansısa regiona, seçiciyə bağlı olmadığını qeyd edib: “Bu zaman seçici öz haqqını konkret kimdən tələb etməli olduğunu bilmir. O, hamıya cavabdehdir, eyni zamanda heç kimə cavabdeh deyil. Buna görə də proporsional sistemin bərpasına ehtiyac yoxdur”. A. Mirzəzadə müxalifətin təkidlə proporsional seçki sisteminin bərpasını tələb etməsinin səbəblərinin ona məlum olmadığını da söyləyib. /APA/