Daxili siyasət

Daxili siyasət

İnsan Haqları üzrə İşçi Qrupun üzvü: “Hakimiyyət təmsilçiləri bizə bildirdilər ki, əfv fərmanı Dünya Azərbaycanlılarının Həmrəylik Günü ərəfəsində imzalanacaq”

24 dekabr 2007 15:01 (UTC +04:00)

İşçi Qrupun üzvü, hüquq müdafiəçisi Səidə Qocamanlı APA-ya bildirib ki, Prezident Aparatının Hüquq-mühafizə orqanları ilə iş şöbəsinin müdiri Fuad Ələsgərovun, Azərbaycanının AŞ PA-dakı nümayəndə heyətinin rəhbəri Səməd Seyidovun, Baş Prokurorluq, Daxili İşlər, Ədliyyə nazirliklərinin, Ali Məhkəmənin təmsilçilərinin iştirakı ilə keçirilən toplantıda əsas müzakirələr gözlənilən əfv fərmanı ilə bağlı olub: “Görüşün keçirilməsində məqsəd hüquq müdafiəçilərinin fərmanla bağlı fikirlərini, təkliflərini öyrənmək idi. Bizə bildirildi ki, fərman 31 Dekabr - Dünya Azərbaycanlılarının Həmrəylik Günü ərəfəsində imzalanacaq. Eyni zamanda o da qeyd olundu ki, Əfv Komissiyası indiyə qədər 550 müraciətə baxıb”.
S. Qocamanlının sözlərinə görə, hakimiyyət təmsilçiləri Əfv Komissiyasında məhbusların özləri tərəfindən yazılan əfv ərizələrinin müzakirə olunduğunu bildiriblər: “Öyrəndik ki, həbsdə olan jurnalistlərdən Mirzə Sakit, Fərəməz Allahverdiyev və Yaşar Ağazadə əfv ərizəsi yazmayıb. Mirzə Sakitin ailəsi tərəfindən də komissiyaya belə bir müraciət edilməyib”.
İşçi Qrupun fəaliyyətini davam etdirməsini zəruri saydıqlarını bildirən hüquq müdafiəçisi əfv fərmanı imzalanandan sonra - gələn ilin əvvəllərində qurumun növbəti iclasının keçirilməsi barədə razılığa gəldiklərini bildirib. /APA/