Daxili siyasət

Ana səhifə

Daxili siyasət

Benita Ferrero-Valdner: “Avropa İttifaqı Bakı-Tiflis-Qars dəmir yolunu regional mahiyyətə malik nəqliyyat marşrutu kimi dəyərləndirmir”

04 fevral 2008 12:39 (UTC +04:00)

- Avropa İttifaqı “üçlüyü”nün Cənubi Qafqaz regionuna səfərinin əsas məqsədi nədir?
- Avropa İttifaqı “üçlüyü” Azərbaycan hakimiyyət orqanları ilə Avropa Qonşuluq Siyasəti çərçivəsində imzalanmış Fəaliyyət Planının icrası, insan hüquqları və seçkilər, regionda dondurulmuş münaqişələr, regional əməkdaşlıq və enerji kimi qarşılıqlı maraq doğuran məsələlər ətrafında geniş müzakirələr aparacaqdır.
- Avropa İttifaqının Azərbaycanda nümayəndəliyinin açılması hansı zərurətdən irəli gəlir?
- Avropa İttifaqı “üçlüyü”nün səfəri çərçivəsində Avropa Komissiyasının Bakıdakı nümayəndəliyinin açılış mərasimi keçiriləcək. Əminik ki, Avropa Komissiyasının Bakıda ofisinin açılması nəticəsində Azərbaycanla münasibətlərimizi dərinləşdirəcək, əlaqələrimizi gücləndirəcəyik. Bu çərçivədə o cümlədən Avropa Qonşuluq Siyasəti Fəaliyyət Planının tam icrasının dəstəklənməsinə yönəlmiş yardım layihələrini icra edəcəyik.
- Bakı-Tiflis-Qars dəmir yolu layihəsini dəstəkləməyən Avropa Komissiyası Avropa Qonşuluq Siyasətinə qoşulmuş Ermənistanı coğrafi qonşusu olan Azərbaycanın işğal etdiyi ərazilərindən çıxmağa niyə dəvət etmir?
- Dəmir yolu ilə bağlı məsələyə gəldikdə Avropa Komissiyası hər zaman vurğulayıb ki, o, inklüziv və “regional” mahiyyətə malik olan nəqliyyat marşrutlarını həm siyasi, həm də maliyyə baxımından dəstəkləyəcək. Ancaq hələlik Bakı-Tiflis-Qars dəmir yolunun bu mahiyyətə malik olduğu görünmür. Dağlıq Qarabağ münaqişəsinə gəldikdə isə ATƏT-in Minsk Qrupu çərçivəsində münaqişənin sülh yolu ilə həllini tapmaq üçün göstərilən cəhdləri Avropa Komissiyası tam dəstəkləyir. Avropa Komissiyası həm Ermənistan, həm də Azərbaycanı regional əməkdaşlıq təşəbbüslərində daha çox iştirak etməyə dəvət edir ki, bu zaman da hər iki tərəf arasında etimad qurula bilər və sülh sazişinin bağlanması sürətlənə bilər.
- Avropa İttifaqının GUAM-la əməkdaşlıq edəcəyi gözlənilirdi...
- GUAM regional təşkilatdır və Avropa Komissiyasının onunla müəyyən münasibət və əlaqələri vardır, onlar arasında fəaliyyət müəyyən dərəcədə əlaqələndirilir.
- Azərbaycanın Ümumdünya Ticarət Təşkilatına qəbul olunması üçün Avropa İttifaqının göstərdiyi dəstək çərçivəsində hansısa layihələrin həyata keçirilməsi nəzərdə tutulurmu?
- Avropa İttifaqı layihələr və dialoqlar çərçivəsində Azərbaycanın ÜTT-na qəbul olunması prosesini dəstəkləyir. Ümid edirik ki, Azərbaycan tezliklə ÜTT-na qəbul olunacaq, ancaq əsas məsələ ÜTT-ya üzv dövlətlərin hamısının buna razı olmasıdır. ÜTT komponenti TASİS çərçivəsində əvvəlki “TƏS-in İcrasının Dəstəklənməsi” layihəsinə daxil edilib.
- Avropa İttifaqı Odessa-Brodı-Qdansk-Plotsk neft kəmərinin perspektivini necə dəyərləndirir?
- Avropa Komissiyası Odessa-Brodi-Plotsk layihəsini, o cümlədən boru kəmərinin Polşayadək uzadılmasını çərçivəsində texniki-iqtisadi əsaslandırmanın aparıldığı maliyyə yardımı vasitəsilə dəstəkləməyə davam edir. Buna görə də Azərbaycan və digər ölkələrin bu mühüm layihəyə daxil olmasını alqışlayırıq. Əlavə olaraq, Ukraynada yerləşəcək neft-emalı zavodu birgə layihəsi vasitəsilə Azərbaycanın iştirak etməsi bu regionda enerji təchizatlarının artmasına və Azərbaycanın Aİ enerji bazarında tam iştirakına yardım edəcək.
- Avropa Komissiyası Transxəzər neft və qaz kəmərləri və “Nabucco” layihələrinə maliyyə dəstək verəcəkmi?
- Avropa İttifaqının enerji təchizatını çox-şaxəli istiqamətdə inkişaf etdirmək istiqamətində göstərdiyi cəhdlər baxımından Transxəzər və “Nabucco” layihəsi prioritet layihədir. Ümumiyyətlə isə Avropa Komissiyası iqtisadi və ekoloji cəhətdən əsaslandırılmış hazırlıq mərhələsində olan layihələri dəstəkləyir. Avropa İnvestisiya Bankının genişləndirilmiş səlahiyyətləri çərçivəsində hazırda infrastruktur layihələrini, eləcə də AYİB layihələrini maliyyələşdirə bilər.
- Fəaliyyət Planında əksini tapmış 10 əsas prioritetdən biri olan Dağlıq Qarabağ münaqişəsinin sülh yolu ilə həll olunması istiqamətində Avropa İttifaqı tərəfindən hansı addımlar atılır?
- Avropa İttifaqı ATƏT-in Minsk Qrupunun vasitəçi kimi göstərdiyi cəhdləri tam dəstəkləyir, Ermənistan və Azərbaycanı münaqişənin sülh yolu ilə tezliklə və hər iki tərəf üçün məqbul yolla həll olunması variantını tapması üçün təkid edir. Bu kontekstdə Avropa Komissiyası münaqişənin sülh yolu ilə tənzimlənməsi üçün ilkin şərtlərin və əlverişli mühitin yaradılmasına yardım edə bilər. Buna görə də Avropa Komissiyası Ermənistan və Azərbaycanı regional əməkdaşlıq təşəbbüslərində daha çox iştirak etməyə dəvət edir ki, bu zaman da hər iki tərəf arasında etimad yarana bilər və sülh sazişinin bağlanması sürətlənər. /APA/