Daxili siyasət

Ana səhifə

Daxili siyasət

Çingiz Dəmiroğlu: “AXCP-nin gücü Müsavatın bir rayon təşkilatının gücündən azdır”

12 fevral 2008 13:59 (UTC +04:00)

Bakı. Ramil Məmmədov-APA. “Azadlıq” blokunun müxalifətin yeganə güc mərkəzinə iddia etməsi absurddur. Təkcə AXCP-də baş verən parçalanmalardan sonra bu partiyanın gücü Müsavat Partiyasının bir rayon təşkilatı qədər qalıb”. Tərəqqi Partiyasının sədri Çingiz Dəmiroğlu APA-ya açıqlamasında bildirib ki, son beş il ərzində AXCP-də böyük parçalanmalar baş verib və nəticədə ziyalıların, professorların cəmləşdiyi Elçibəy fraksiyası Müsavat Partiyasına keçib. O, Azərbaycan Milli İstiqlal Partiyasında da bu prosesin yaşandığını vurğulayıb. Təmsil olunduğu “Beşliy”i daha güclü hesab edən Ç. Dəmiroğlu Tərəqqi Partiyasının sosial bazasının “Azadlıq” blokundan çox olduğunu söyləyib: “Beşlik çox güclüdür. Ötən il “Azadlıq” blokundakı partiyaların üzvlərinin sayı haqda açıqlama verilərkən aydın oldu ki, onların Tərəqqi Partiyasından 30 min az üzvü var. Dəfələrlə demişəm, indi də deyirəm. Seçki yoxdur-yoxdur, gəlin anketləri sayaq. Böyük kimdir, kiçik kimdir, səs kimdədir bilinsin. Kim özünü güclü hesab edir, qoy o fikirdə də qalsın”. Müxalifət düşərgəsində təmsil olunan partiyaların ayrı-ayrılıqda seçkidə uğur qazanmasının mümkünsüzlüyünü deyən partiya sədrinin fikrincə, heç bir partiya təkbaşına təmsilçilik məsələsində 5 min məntəqəni əhatə edə bilməz. O, bu gücün yalnız “Beşlik”də olduğunu qeyd edib. Ç. Dəmiroğlu müxalifət düşərgəsində təmsil olunan partiyalar arasında barışdırıcı funksiyanı öz üzərinə götürdüyünü də bildirib: “Çingiz Dəmiroğlu qədər müxalifətin daxilində sayılıb-seçilən ikinci bir adam olmayıb. Mən “Beşliy”in koordinatoruyam, “İyirmiliy”in ağsaqqalıyam. “ATA” blokunun sədriyəm. Kim məni eşitmir? İndiyə qədər bu cür qəbul edilən adam olub? Mən mərkəzdəyəm. Həm “Beşlik”dəyəm, həm “ATA” blokundayam, həm də “İyirmilik”dəyəm. Mən hər yerdəyəm. Bunlar arasında əlaqələrin yaradılması da mənə həvalə olunub”. AXCP sədrinin müavini Həsən Kərimov isə Ç. Dəmiroğlunun sözlərinə şərh verməkdən imtina edib: “Çingiz Dəmiroğlunun partiyasının AXCP-nin rayon şöbəsinin, dayaq dəstəsinin ilk özəyi qədər gücü yoxdur. Onun AXCP haqda söz deməyə mənəvi haqqı da yoxdur”.